داغ دل ہیں غیرت صد لالہ زار اب کے برس

داغ دل ہیں غیرت صد لالہ زار اب کے برس

بعد مدت کے ہے پھر جوش بہار اب کے برس

آبیاری سے تری اے تیغ یار اب کے برس

تختۂ گل ہے ہمارا جسم زار اب کے برس

تا بہ دامن ہے گریباں تار تار اب کے برس

ٹوٹتے ہیں تلووں میں چبھ چبھ کے خار اب کے برس

ہے یہ زور آمد فصل بہار اب کے برس

مست ہیں زاہد بھی مثل بادہ خوار اب کے برس

الفت ساقی نے لو زاہد کو بھی کھینچا ادھر

دور مے کا سبحہ پر ہوگا شمار اب کے برس

فصل گل میں بعد مردن بھی ہوا جوش جنوں

سنگ طفلاں سے ہو ترمیم مزار اب کے برس

شیشہ میں پنہاں ہے مے اور دل میں ذوق مے کشی

آتے ہی ساقی کے اے ابر بہار اب کے برس

ساقیا عینک چڑھے ہوں رنج و غم بالائے طاق

بادۂ دی سالہ کا شیشہ اتار اب کے برس

ظلم پر باندھی ہے پھر صیاد و گلچیں نے کمر

قید بلبل کی ہے گلشن میں پکار اب کے برس

آرزو ہے بعد مردن بھی رہوں سیراب مے

صرف جام و خم کریں میرا غبار اب کے برس

جوش خون بلبل شیدا کا پیدا ہو اثر

لے اگر فصد رگ گل نوک خار اب کے برس

جلتے ہیں دل بلبلوں کے آشیاں کی طرح سے

آتش گل کی ہے گلشن میں پکار اب کے برس

قسمت اپنی اپنی ہے اچھا مبارک ہو حبیبؔ

خار غم ہم کو تمہیں پہلوئے یار اب کے برس

dagh-e-dil hain ghairat-e-sad lala zar ab ke baras

baad muddat ke hai phir josh-e-bahar ab ke baras

abiyari se tiri ai tegh-e-yar ab ke baras

takhta-e-gul hai hamara jism-e-zar ab ke baras

ta ba daman hai gareban tar tar ab ke baras

tutte hain talwon mein chubh chubh ke khar ab ke baras

hai ye zor amad-e-fasl-e-bahar ab ke baras

mast hain zahid bhi misl-e-bada khwar ab ke baras

ulfat saqi ne lo zahid ko bhi khincha idhar

daur-e-mai ka subha par hoga shumar ab ke baras

fasl-e-gul mein baad murdan bhi hua josh-e-junun

sang tiflan se ho tarmim-e-mazar ab ke baras

shisha mein pinhan hai mai aur dil mein zauq-e-mai kashi

ate hi saqi ke ai abr-e-bahar ab ke baras

saqiya ainak charhe hun ranj-o-gham bala-e-taq

bada-e-di sala ka shisha utar ab ke baras

zulm par bandhi hai phir sayyad-o-gulchin ne kamar

qaid bulbul ki hai gulshan mein pukar ab ke baras

arzu hai baad murdan bhi rahun sairab mai

sirf-e-jam-o-kham karen mera ghubar ab ke baras

josh-e-khun-e-bulbul-e-shaida ka paida ho asar

le agar fasd-e-rag-e-gul nok-e-khar ab ke baras

jalte hain dil bulbulon ke ashiyan ki tarah se

atish-e-gul ki hai gulshan mein pukar ab ke baras

qismat apni apni hai achchha mubarak ho habib

khar-e-gham ham ko tumhen pahlu-e-yar ab ke baras