داغوں سے دل و سینہ کے افروختہ جاں ہوں

داغوں سے دل و سینہ کے افروختہ جاں ہوں

گو میں چمن تازہ ہوں پر وقف خزاں ہوں

پہلو میں اگر دل ہے تو تو دل میں ہے میرے

گو ننگ خلائق ہوں مگر جان جہاں ہوں

جس خاک پہ میں بیٹھ گیا فتنہ اٹھایا

کس سرو خراماں کی کف پا کا نشاں ہوں

ہم راہ تمہارے ہوں کسی جا ہوں کہیں ہوں

سایہ کی طرح تم ہو جہاں میں بھی وہاں ہوں

یا رب ہو برا وحشت دل کا کہ نہیں چین

جب خاک ہوا مر کے تو اب ریگ رواں ہوں

کیا زیست ہے یہ خاک مری عاشق ناشاد

گہہ مصرف فریاد ہوں گہہ وقف فغاں ہوں

daghon se dil-o-sina ke afrokhta jan hun

go main chaman taza hun par waqf khizan hun

pahlu mein agar dil hai to to dil mein hai mere

go nang-e-khalaiq hun magar jan-e-jahan hun

jis khak pe main baith gaya fitna uthaya

kis sarw khiraman ki kaf-e-pa ka nishan hun

ham rah tumhare hun kisi ja hun kahin hun

saya ki tarah tum ho jahan mein bhi wahan hun

ya rab ho bura wahshat-e-dil ka ke nahin chain

jab khak hua mar ke to ab reg-e-rawan hun

kya zist hai ye khak miri ashiq-e-nashad

gah masraf fariyad hun gah waqf-e-fughan hun