دامن قاتل جو اڑ اڑ کر ہوا دینے لگے

دامن قاتل جو اڑ اڑ کر ہوا دینے لگے

کیا بتاؤں زخم دل کیا کیا دعا دینے لگے

وائے ناکامی کہاں سفاک نے روکا ہے ہاتھ

زخم ہائے شوق جب کچھ کچھ مزا دینے لگے

چارہ سازو مجھ سے رسوا جاں بلب بیمار کو

زہر دینا چاہئے تھا تم دوا دینے لگے

یاس و حرماں آہ سوزاں اشک خوں داغ جنوں

حضرت عشق اور کیا اس کے سوا دینے لگے

آج ہو شاید کسی کو آتش غم کی خبر

شکر ہے اب استخواں بوئے وفا دینے لگے

کیا مخالف ہو گئی ہم سے زمانے کی ہوا

یاسؔ دیکھو حضرت دل بھی دغا دینے لگے

daman-e-qatil jo ur ur kar hua dene lage

kya bataun zakhm-e-dil kya kya dua dene lage

wae nakami kahan saffak ne roka hai hath

zakhm ha-e-shauq jab kuchh kuchh maza dene lage

chara sazo mujh se ruswa jan balb bimar ko

zahr dena chahiye tha tum dawa dene lage

yas-o-hirman ah-e-sozan ashk-e-khun dagh-e-junun

hazrat-e-ishq aur kiya us ke siwa dene lage

aj ho shayad kisi ko atish-e-gham ki khabar

shukr hai ab ustukhwan bu-e-wafa dene lage

kya mukhalif ho gai ham se zamane ki hawa

yas dekho hazrat-e-dil bhi dagha dene lage