بات کچھ ہم سے بن نہ آئی آج

بات کچھ ہم سے بن نہ آئی آج

بول کر ہم نے منہ کی کھائی آج

چپ پر اپنی بھرم تھے کیا کیا کچھ

بات بگڑی بنی بنائی آج

شکوہ کرنے کی خو نہ تھی اپنی

پر طبیعت ہی کچھ بھر آئی آج

بزم ساقی نے دی الٹ ساری

خوب بھر بھر کے خم لنڈھائی آج

معصیت پر ہے دیر سے یا رب

نفس اور شرع میں لڑائی آج

غالب آتا ہے نفس دوں یا شرع

دیکھنی ہے تری خدائی آج

چور ہے دل میں کچھ نہ کچھ یارو

نیند پھر رات بھر نہ آئی آج

زد سے الفت کی بچ کے چلنا تھا

مفت حالیؔ نے چوٹ کھائی آج

bat kuchh ham se ban na ai aj

bol kar ham ne munh ki khai aj

chup par apni bharam the kya kiya kuchh

bat bigri bani banai aj

shikwa karne ki khu na thi apni

par tabiat hi kuchh bhar ai aj

bazm-e-saqi ne di ulat sari

khub bhar bhar ke kham lundhai aj

maasiyat par hai der se ya rab

nafas aur shara mein larai aj

ghalib ata hai nafas dun ya shara

dekhni hai tiri khudai aj

chur hai dil mein kuchh na kuchh yaro

nind phir rat bhar na ai aj

zad se ulfat ki bach ke chalna tha

muft hali ne chot khai aj