خاموش ہیں لب اور آنکھوں سے آنسو ہیں کہ پیہم بہتے ہیں

خاموش ہیں لب اور آنکھوں سے آنسو ہیں کہ پیہم بہتے ہیں

ہم سامنے ان کے بیٹھے ہیں اور قصۂ فرقت کہتے ہیں

اب حسن و عشق میں فرق نہیں اب دونوں کی اک حالت ہے

میں ان کو دیکھتا رہتا ہوں وہ مجھ کو دیکھتے رہتے ہیں

ان کی وہ حیا وہ خاموشی اپنی وہ محبت کی نظریں

وہ سننے کو سب کچھ سنتے ہیں ہم کہنے کو سب کچھ کہتے ہیں

اس شوق فراواں کی یا رب آخر کوئی حد بھی ہے کہ نہیں

انکار کریں وہ یا وعدہ ہم راستہ دیکھتے رہتے ہیں

ہمدرد نہیں ہم راز نہیں کس سے کہئے کیوں کر کہئے

جو دل پہ گزرتی رہتی ہے جو جان پہ صدمے سہتے ہیں

آ دیکھ کہ ظالم فرقت میں کیا حال مرا بے حال ہوا

آہوں سے شرارے جھڑتے ہیں آنکھوں سے دریا بہتے ہیں

اکبرؔ شاید دل کھو بیٹھے وہ جلسے وہ احباب نہیں

تنہا خاموش سے پھرتے ہیں ہر وقت اداس سے رہتے ہیں

khamosh hain lab aur ankhon se ansu hain ke paiham bahte hain

ham samne un ke baithe hain aur qissa-e-furqat kahte hain

ab husn-o-ishq mein farq nahin ab donon ki ik halat hai

main un ko dekhta rahta hun wo mujh ko dekhte rahte hain

un ki wo haya wo khamoshi apni wo mohabbat ki nazren

wo sunne ko sab kuchh sunte hain ham kahne ko sab kuchh kahte hain

is shauq-e-farawan ki ya rab akhir koi had bhi hai ke nahin

inkar karen wo ya waada ham rasta dekhte rahte hain

hamdard nahin ham raz nahin kis se kahiye kyun kar kahiye

jo dil pe guzarti rahti hai jo jan pe sadme sahte hain

a dekh ke zalim furqat mein kya hal mira be hal hua

ahon se sharare jharte hain ankhon se dariya bahte hain

akbar shayad dil kho baithe wo jalse wo ahbab nahin

tanha khamosh se phirte hain har waqt udas se rahte hain