حیرتوں کے سلسلے سوز نہاں تک آ گئے

حیرتوں کے سلسلے سوز نہاں تک آ گئے

ہم نظر تک چاہتے تھے تم تو جاں تک آ گئے

نا مرادی اپنی قسمت گمرہی اپنا نصیب

کارواں کی خیر ہو ہم کارواں تک آ گئے

ان کی پلکوں پر ستارے اپنے ہونٹوں پہ ہنسی

قصۂ غم کہتے کہتے ہم کہاں تک آ گئے

زلف میں خوشبو نہ تھی یا رنگ عارض میں نہ تھا

آپ کس کی آرزو میں گلستاں تک آ گئے

رفتہ رفتہ رنگ لایا جذبۂ خاموش عشق

وہ تغافل کرتے کرتے امتحاں تک آ گئے

خود تمہیں چاک گریباں کا شعور آ جائے گا

تم وہاں تک آ تو جاؤ ہم جہاں تک آ گئے

آج قابلؔ مے کدے میں انقلاب آنے کو ہے

اہل دل اندیشۂ سود و زیاں تک آ گئے

hairaton ke silsile soz-e-nihan tak a gae

ham nazar tak chahte the tum to jan tak a gae

na muradi apni qismat gumrahi apna nasib

karwan ki khair ho ham karwan tak a gae

un ki palkon par sitare apne honton pe hansi

qissa-e-gham kahte kahte ham kahan tak a gae

zulf mein khushbu na thi ya rang-e-ariz mein na tha

ap kis ki arzu mein gulsitan tak a gae

rafta rafta rang laya jazba-e-khamosh ishq

wo taghaful karte karte imtihan tak a gae

khud tumhen chak-e-gareban ka shuur a jaega

tum wahan tak a to jao ham jahan tak a gae

aj qabil mai kade mein inqilab ane ko hai

ahl-e-dil andesha-e-sud-o-ziyan tak a gae