خالی عاشق سے کبھی کوچۂ جاناں نہ رہا

خالی عاشق سے کبھی کوچۂ جاناں نہ رہا

کون سی شب وہ تھی جس میں کوئی گریاں نہ رہا

دیکھیے ناخن وحشت کے سبب عاشق کا

تار داماں نہ رہا تار گریباں نہ رہا

شیخ کیا وعظ سناتا ہے دکھانے کے لیے

دل میں تصویر صنم ہے ترا ایماں نہ رہا

ہو گیا ساتھ دل زار کے وہ بھی رخصت

مایۂ زیست جو اپنا تھا وہ ارماں نہ رہا

ہم صفیرو نہ کہو نغمہ زنی کو مجھ سے

اب چلی باد خزاں اور گل خنداں نہ رہا

رخ دکھاتے ہی کیا محو تماشا تو نے

کب ترا شیفتہ آئینہ سا حیراں نہ رہا

اشک دیدہ تو ہوئے خشک جمیلہؔ کہہ دو

خضر تم آئے تو کیا چشمۂ حیواں نہ رہا