خاموش داب عشق کو بلبل لیے ہوئے

خاموش داب عشق کو بلبل لیے ہوئے

گل مست ہے چمن میں پیالہ پیے ہوئے

امسال فصل گل میں وہ پھر چاک ہو گئے

اگلے برس کے تھے جو گریباں سیے ہوئے

ہم بھی ہوا میں اک گل نوخیز حسن کے

برسوں پھرے ہیں چاک گریباں کیے ہوئے

دوکانیں مے فروشوں کی کب سے پڑی ہیں بند

رہ رہ گئے ہیں قفل دیے کے دیے ہوئے

عشق صنم ہے اس میں ہیں خودداریاں ضرور

اے دل خدا کے واسطے خود کو لیے ہوئے

مرشد ہے عشق ہم ہیں مرید اس جناب کے

برسوں گزر گئے ہیں پیالہ پیے ہوئے

وہ آ کے مسکرائے اس انداز و ناز سے

کھل کھل گئے جو زخم جگر تھے سیے ہوئے

روز ازل سے دخل وجود و عدم میں ہے

دونوں علاقے ہیں یہ ہمارے لیے ہوئے

ہیں بت پرست دیر میں حاجی ہیں کعبہ میں

طالب رضائے دوست کے دھرنے دیے ہوئے

میدان امتحاں میں ہمیں بھیج دیجیے

کہیے انہیں یہ کام ہیں جن کے کیے ہوئے

نامرد اپنے وادی میں رکھے گا کیا قدم

سر ہو مہم عشق نہ بے سر دیے ہوئے

کس کس طرح کا بھیس بدل کر پہنچتے ہیں

عاشق ہوئے نہ آپ کے بہروپئے ہوئے

حاصل ہوا بتوں سے نہ عاشق کو مدعا

روشن کبھی نہ دیر میں گھی کے دیے ہوئے

تعویذ و نقش کچھ نہیں کرتے اثر وہاں

سارے یہ کھٹکھٹے ہیں ہمارے کئے ہوئے

اک شب ہوئی نصیب سلیماں نہ جو پری

ہم روز سوئے اس کو بغل میں لیے ہوئے

آنکھوں میں پھرتی ہیں جو وہ آنکھیں نشیلیاں

دو بوتلوں کی مستی ہے بے مے پیے ہوئے

باندھا جو چست چست مضامین نو کے ساتھ

بندش سے میری تنگ بہت قافیے ہوئے

عاشق مزاج روتے ہیں پڑھ پڑھ کے بیشتر

اشعار رندؔ کے نہ ہوئے مرثیے ہوئے

khamosh dab ishq ko bulbul liye hue

gul mast hai chaman mein pyala piye hue

imsal fasl-e-gul mein wo phir chak ho gae

agle baras ke the jo gareban saye hue

ham bhi hawa mein ik gul-e-naukhez husn ke

barson phire hain chak-e-gareban kiye hue

dukanen mai faroshon ki kab se pari hain band

rah rah gae hain qufl diye ke diye hue

ishq sanam hai is mein hain khuddariyan zarur

ai dil khuda ke waste khud ko liye hue

murshid hai ishq ham hain murid is janab ke

barson guzar gae hain pyala piye hue

wo a ke muskurae is andaz-o-naz se

khul khul gae jo zakhm-e-jigar the saye hue

roz-e-azal se dakhl wajud-o-adam mein hai

donon ilaqe hain ye hamare liye hue

hain but parast der mein haji hain kaaba mein

talib raza-e-dost ke dharne diye hue

maidan-e-imtihan mein hamen bhej dijiye

kahiye unhen ye kam hain jin ke kiye hue

namard apne wadi mein rakhega kya qadam

sar ho muhim ishq na be sar diye hue

kis kis tarah ka bhes badal kar pahunchte hain

ashiq hue na ap ke bahropiye hue

hasil hua buton se na ashiq ko muddaa

raushan kabhi na der mein ghi ke diye hue

taawiz-o-naqsh kuchh nahin karte asar wahan

sare ye khitkhate hain hamare kiye hue

ik shab hui nasib sulaiman na jo pari

ham roz su-e-us ko baghal mein liye hue

ankhon mein phirti hain jo wo ankhen nashiliyan

do botalon ki masti hai be mai piye hue

bandha jo chust chust mazamin-e-nau ke sath

bandish se meri tang bahut qafiye hue

ashiq mizaj rote hain parh parh ke beshtar

ashar rind ke na hue marsiye hue