خاطر کرے ہے جمع وہ ہر بار ایک طرح

خاطر کرے ہے جمع وہ ہر بار ایک طرح

کرتا ہے چرخ مجھ سے نئے یار ایک طرح

میں اور قیس و کوہ کن اب جو زباں پہ ہیں

مارے گئے ہیں سب یہ گنہ گار ایک طرح

منظور اس کو پردے میں ہیں بے حجابیاں

کس سے ہوا دو چار وہ عیار ایک طرح

سب طرحیں اس کی اپنی نظر میں تھیں کیا کہیں

پر ہم بھی ہو گئے ہیں گرفتار ایک طرح

گھر اس کے جا کے آتے ہیں پامال ہو کے ہم

کریے مکاں ہی اب سر بازار ایک طرح

گہ گل ہے گاہ رنگ گہے باغ کی ہے بو

آتا نہیں نظر وہ طرح دار ایک طرح

نیرنگ حسن دوست سے کر آنکھیں آشنا

ممکن نہیں وگرنہ ہو دیدار ایک طرح

سو طرح طرح دیکھ طبیبوں نے یہ کہا

صحت پذیر ہوئے یہ بیمار ایک طرح

سو بھی ہزار طرح سے ٹھہراوتے ہیں ہم

تسکین کے لیے تری ناچار ایک طرح

بن جی دئیے ہو کوئی طرح فائدہ نہیں

گر ہے تو یہ ہے اے جگر افگار ایک طرح

ہر طرح تو ذلیل ہی رکھتا ہے میرؔ کو

ہوتا ہے عاشقی میں کوئی خوار ایک طرح

khatir kare hai jama wo har bar ek tarah

karta hai charkh mujh se nae yar ek tarah

main aur qais-o-koh kin ab jo zaban pe hain

mare gae hain sab ye gunah gar ek tarah

manzur us ko parde mein hain be hijabiyan

kis se hua do char wo ayyar ek tarah

sab tarhen us ki apni nazar mein thin kya kahen

par ham bhi ho gae hain giraftar ek tarah

ghar us ke ja ke ate hain pamal ho ke ham

kariye makan hi ab sar-e-bazar ek tarah

gah gul hai gah rang gahe bagh ki hai bu

ata nahin nazar wo tarah dar ek tarah

nairang-e-husn-e-dost se kar ankhen ashna

mumkin nahin wagarna ho didar ek tarah

sau tarah tarah dekh tabibon ne ye kaha

sehhat pazir hue ye bimar ek tarah

so bhi hazar tarah se thahraote hain ham

taskin ke liye tiri nachar ek tarah

ban ji diye ho koi tarah faida nahin

gar hai to ye hai ai jigar afgar ek tarah

har tarah to zalil hi rakhta hai mir ko

hota hai ashiqi mein koi khwar ek tarah