خانۂ زنجیر کا پابند رہتا ہوں سدا

خانۂ زنجیر کا پابند رہتا ہوں سدا

گھر عبث ہو پوچھتے مجھ خانماں برباد کا

عشق قد یار میں کیا ناتوانی کا ہے زور

غش مجھے آیا جو سایہ پڑ گیا شمشاد کا

خود فراموشی تمہاری غیر کے کام آ گئی

یاد رکھیے گا ذرا بھولے سے کہنا یاد کا

خط لکھا کرتے ہیں اب وہ یک قلم مجھ کو شکست

پیچ سے دل توڑتے ہیں عاشق ناشاد کا

عشق پیچاں کا چمن میں جال پھیلا دیکھ کر

بلبلوں کو سرو پر دھوکا ہوا صیاد کا

قامت جاناں سے کرتا ہے اکڑ کر ہم سری

حوصلہ دیکھے تو کوئی سرو بے بنیاد کا

بے زبانی میں امانتؔ کی وہ ہیں گل ریزیاں

ناطقہ ہو بند اے دل بلبل ناشاد کا

khana-e-zanjir ka paband rahta hun sada

ghar abas ho puchhte mujh khanuman barbad ka

ishq qad-e-yar mein kya natawani ka hai zor

ghash mujhe aya jo saya par gaya shamshad ka

khud faramoshi tumhari ghair ke kam a gai

yad rakhiyega zara bhule se kahna yad ka

khat likha karte hain ab wo yak qalam mujh ko shikast

pech se dil torte hain ashiq-e-nashad ka

ishq pechan ka chaman mein jal phaila dekh kar

bulbulon ko sarw par dhoka hua sayyad ka

qamat janan se karta hai akkar kar ham siri

hausla dekhe to koi sarw be buniyad ka

be zabani mein amanat ki wo hain gul reziyan

natiqa ho band ai dil bulbul-e-nashad ka