خداؤں کی خدائی ہو چکی بس — یاس یگانہ چنگیزی (Yaas Yagana Changezi)

خداؤں کی خدائی ہو چکی بس

خدارا بس دہائی ہو چکی بس

کسی ڈھب سے نپٹ لو جب مزا ہے

بہت زور آزمائی ہو چکی بس

بجھائے کون تو جس کو جلائے

پتنگوں کی چڑھائی ہو چکی بس

ہوا میں اڑ گیا ایک ایک پتا

گلوں کی جگ ہنسائی ہو چکی بس

بھلا اب کیا جچوں اپنی نظر میں

نظر اپنی پرائی ہو چکی بس

رہا کیا جب دلوں میں فرق آیا

اسی دن سے جدائی ہو چکی بس

پڑے ہو کون سے گوشے میں تنہا

یگانہؔ کیوں خدائی ہو چکی بس