خدا اثر سے بچائے اس آستانے کو

خدا اثر سے بچائے اس آستانے کو

دعا چلی ہے مری قسمت آزمانے کو

نہ پوچھئے کہ محبت میں مجھ پہ کیا گزری

نہ چھیڑئیے مرے بھولے ہوئے فسانے کو

یہ شعبدے یہ کرشمے کسے میسر تھے

تری نگاہ نے سکھلا دیئے زمانے کو

چمن میں برق نے جھانکا کہ ہم لرز اٹھے

اب اس سے آگ ہی لگ جائے آشیانے کو

خیال یار بھی کھویا ہوا سا رہتا ہے

اب ان کی یاد بھی آتی ہے بھول جانے کو

نگاہ لطف نہ فرما نگاہ ناز کے بعد

جگر میں آگ لگا کر نہ آ بجھانے کو

زمانہ بر سر آزار تھا مگر فانیؔ

تڑپ کے ہم نے بھی تڑپا دیا زمانے کو

khuda asar se bachae is astane ko

dua chali hai miri qismat azmane ko

na puchhiye ke mohabbat mein mujh pe kya guzri

na chheriye mire bhule hue fasane ko

ye shobade ye karishme kise muyassar the

tiri nigah ne sukhla diye zamane ko

chaman mein barq ne jhanka ke ham laraz uthe

ab us se ag hi lag jae ashiyane ko

khayal-e-yar bhi khoya hua sa rahta hai

ab un ki yad bhi ati hai bhul jane ko

nigah-e-lutf na farma nigah-e-naz ke baad

jigar mein ag laga kar na a bujhane ko

zamana bar sar azar tha magar fani

tarap ke ham ne bhi tarpa diya zamane ko