خدا کے واسطے چہرے سے ٹک نقاب اٹھا

خدا کے واسطے چہرے سے ٹک نقاب اٹھا

یہ درمیان سے اب پردۂ حجاب اٹھا

یہ کون بادہ پرستی ہے اے بت بد مست

اٹھا جو بزم سے تیری سو ہو کباب اٹھا

مطالعے سے ترے بیت ابروؤں کے شوخ

رکھی ہے شیخ نے اب طاق پر کتاب اٹھا

بسان نقش قدم جس نے پا تراب کیا

وہ راہ عشق میں مٹ کر غرض شتاب اٹھا

بہ چشم تر ہی کوئی دم تو بیٹھ ورنہ عبث

تو ایک دم کے لیے بحر سے حباب اٹھا

پیا ہے شیشۂ گردوں سے جس نے اک جرعہ

مثال جام وہ با دیدۂ پر آب اٹھا

نصیرؔ شور نہ کر فتنہ ہووے گا برپا

خدا نخواستہ اب گر وہ مست خواب اٹھا

khuda ke waste chehre se tuk naqab utha

ye darmiyan se ab parda-e-hijab utha

ye kaun bada parasti hai ai but-e-bad mast

utha jo bazm se teri so ho kabab utha

mutalae se tire bit abruon ke shokh

rakhi hai shaikh ne ab taq par kitab utha

basan-e-naqsh-e-qadam jis ne pa turab kiya

wo rah-e-ishq mein mit kar gharaz shitab utha

ba chashm-e-tar hi koi dam to baith warna abas

to ek dam ke liye bahr se habab utha

piya hai shisha-e-gardun se jis ne ik jura

misal-e-jam wo ba dida-e-pur ab utha

nasir shor na kar fitna howe ga barpa

khuda nakhwasta ab gar wo mast-e-khwab utha