جور افلاک بسکہ جھیلے ہیں

جور افلاک بسکہ جھیلے ہیں

ایسے پاپڑ بہت سے بیلے ہیں

گہ حضوری ہے گاہ ہے دوری

گہ اکیلے ہیں گہ دو کیلے ہیں

اسپ تازی نظر نہیں آتے

سو کھروں سے بھرے طویلے ہیں

کہتے ہیں یاں جسے قمار عشق

کھیل ایسے بہت سے کھیلے ہیں

جیتے ہیں وہ قمار عشق میں یار

جان پر اپنی جو کہ کھیلے ہیں

ٹھہرے کب جنگ حسن میں یہ شیخ

ایک مدت کے یہ بھگیلے ہیں

پاس اپنے دوئی کا نام نہیں

جب سے پیدا ہوئے اکیلے ہیں

نہ دکھانا لحد میں آنکھیں نکیر

پاس اپنے بھی قل کے ڈھیلے ہیں

کفر و دیں کا ہو فیصلہ کیوں کر

ایک مدت کے یہ منجھیلے ہیں

دیر و کعبہ کی بھیڑ بھاڑ ہے کیا

ایسے دیکھے بہت سے میلے ہیں

گریۂ پر اثر کی شدت ہے

صاف آب بقا کے ریلے ہیں

بھیجا اپنا خیال اس بت نے

جب سنا منتہیؔ اکیلے ہیں

jaur-e-aflak baske jhele hain

aise papar bahut se bele hain

gah huzuri hai gah hai duri

gah akele hain gah do kile hain

asp tazi nazar nahin ate

so kharon se bhare tawile hain

kahte hain yan jise qimar-e-ishq

khel aise bahut se khele hain

jite hain wo qimar-e-ishq mein yar

jan par apni jo ke khele hain

thahre kab jang husn mein ye shaikh

ek muddat ke ye bhagile hain

pas apne dui ka nam nahin

jab se paida hue akele hain

na dikhana lahad mein ankhen nakir

pas apne bhi qul ke dhile hain

kufr-o-din ka ho faisla kyun kar

ek muddat ke ye manjhele hain

dair-o-kaaba ki bhir bhar hai kya

aise dekhe bahut se mele hain

girya-e-pur asar ki shiddat hai

saf ab-e-baqa ke rele hain

bheja apna khayal us but ne

jab suna muntahi akele hain