جوانی کی حالت گزر جائے گی

جوانی کی حالت گزر جائے گی

چڑھی ہے جو سر پر اتر جائے گی

جدھر کو مری چشم تر جائے گی

ادھر کام دریا کا کر جائے گی

زمانے کی ایذا کا شکوہ نہ کر

گزرتے گزرتے گزر جائے گی

کھلے گا تجھے عشق بازی کا حال

یہ حرص ہوا جبکہ مر جائے گی

مرے جسم خاکی سے ہو کے جدا

یہ روح رواں پھر کدھر جائے گی

مرے نغموں سے عندلیب چمن

کہاں اڑ کے تو مشت پر جائے گی

توجہ تری او بت بے وفا

مرا کام آخر کو کر جائے گی

بہار چمن جبکہ ہوگی خزاں

مری وحشت دل کدھر جائے گی

اگر جذبۂ دل پہ قابو رہا

شب وصل کی پھر ٹھہر جائے گی

کھنچی ہے جو تیغ محبت دلا

یہی ایک دن تیرے سر جائے گی

چڑھی ہوگی کچے گھڑے کی جسے

اترتے اترتے اتر جائے گی

قمار محبت میں گر آہ کی

یہ جیتی ہوئی بازی ہر جائے گی

مری مرگ ایسی ہے اے منتہیؔ

کہ جس کی عدم تک خبر جائے گی

jawani ki halat guzar jaegi

charhi hai jo sar par utar jaegi

jidhar ko miri chashm-e-tar jaegi

idhar kam dariya ka kar jaegi

zamane ki iza ka shikwa na kar

guzarte guzarte guzar jaegi

khulega tujhe ishq bazi ka hal

ye hirs hua jabke mar jaegi

mire jism-e-khaki se ho ke juda

ye ruh-e-rawan phir kidhar jaegi

mire naghmon se andalib-e-chaman

kahan ur ke to musht par jaegi

tawajjoh tiri o but-e-be wafa

mira kam akhir ko kar jaegi

bahar-e-chaman jabke hogi khizan

miri wahshat-e-dil kidhar jaegi

agar jazba-e-dil pe qabu raha

shab-e-wasl ki phir thahar jaegi

khinchi hai jo tegh-e-mohabbat dila

yahi ek din tere sar jaegi

charhi hogi kachche ghare ki jise

utarte utarte utar jaegi

qimar-e-mohabbat mein gar ah ki

ye jiti hui bazi har jaegi

miri marg aisi hai ai muntahi

ke jis ki adam tak khabar jaegi