جوانی یاد ہم کو اپنی پھر بے اختیار آئی

جوانی یاد ہم کو اپنی پھر بے اختیار آئی

ہوا دیوانوں میں جب غل بہار آئی بہار آئی

ہوا تھا مرگ سے غافل میں کس دن جوش وحشت میں

صبا کیوں لے کے میرے سامنے مشت غبار آئی

دکھائے رنج پیری کے اجل تیرے تغافل نے

تجھے آنا تھا پہلے آہ تو انجام کار آئی

ہمارے توسن عمر رواں کے تیز کرنے کو

شمیم زلف دوش باد صرصر پر سوار آئی

نہ پایا وقت اے زاہد کوئی میں نے عبادت کا

شب ہجراں ہوئی آخر تو صبح انتظار آئی

نہ کچھ خطرہ خزاں کا ہے نہ احسان بہار اس پر

عدم سے اپنی شاخ آرزو بے برگ و بار آئی

ہماری دیکھیو غفلت نہ سمجھے وائے نادانی

ہمیں دو دن کے بہلانے کو عمر بے مدار آئی

جو ننگ عشق ہیں وہ بو الہوس فریاد کرتے ہیں

لب زخم ہوسؔ سے کب صدائے زینہار آئی

jawani yad ham ko apni phir be ikhtiyar ai

hawa diwanon mein jab ghul bahar ai bahar ai

hua tha marg se ghafil mein kis din josh-e-wahshat mein

saba kyun le ke mere samne musht-e-ghubar ai

dikhae ranj piri ke ajal tere taghaful ne

tujhe ana tha pahle ah to anjam-e-kar ai

hamare tosun-e-umr-e-rawan ke tez karne ko

shamim-e-zulf-e-dosh-e-bad-e-sarsar par sawar ai

na paya waqt ai zahid koi main ne ibadat ka

shab-e-hijran hui akhir to subh-e-intizar ai

na kuchh khatra khizan ka hai na ehsan-e-bahar us par

adam se apni shakh-e-arzu be barg-o-bar ai

hamari dekhiyo ghaflat na samjhe wae nadani

hamen do din ke bahlane ko umr be madar ai

jo nang-e-ishq hain wo bu alhawas fariyad karte hain

lab-e-zakhm-e-hawas se kab sada-e-zinhar ai