آدمی آدمی سے ملتا ہے — جگر مراد آبادی (Jigar Moradabadi)

آدمی آدمی سے ملتا ہے

دل مگر کم کسی سے ملتا ہے

بھول جاتا ہوں میں ستم اس کے

وہ کچھ اس سادگی سے ملتا ہے

آج کیا بات ہے کہ پھولوں کا

رنگ تیری ہنسی سے ملتا ہے

سلسلہ فتنۂ قیامت کا

تیری خوش قامتی سے ملتا ہے

مل کے بھی جو کبھی نہیں ملتا

ٹوٹ کر دل اسی سے ملتا ہے

کاروبار جہاں سنورتے ہیں

ہوش جب بے خودی سے ملتا ہے

روح کو بھی مزا محبت کا

دل کی ہم سائیگی سے ملتا ہے