جوش و خروش پر ہے بہار چمن ہنوز

جوش و خروش پر ہے بہار چمن ہنوز

پیتے ہیں نوجوان شراب کہن ہنوز

پاتا نہیں میں یار کو میل سخن ہنوز

معدوم ہے کمر کی طرح سے دہن ہنوز

برسوں سے رو رہا ہوں شب و روز متصل

ہنستے ہیں مدتوں سے مرے زخم تن ہنوز

رخسار یار پر نہیں آغاز خط ابھی

دیکھا نہیں ان آنکھوں نے سورج گہن ہنوز

انجام کار کا نہیں آتا خیال کچھ

غربت میں بھولے بیٹھے ہیں یار وطن ہنوز

عالم ان ابرووں کی کجی کا جو ہے سو ہے

بل کھا رہی ہے زلف شکن در شکن ہنوز

خلعت کی کیا امید رکھیں آسماں سے ہم

اس نے تو داب رکھا ہے اپنا کفن ہنوز

عالم حجاب یار کا تا حال ہے وہی

خلوت نشیں ہے روشنیٔ انجمن ہنوز

اپنے صفائے سینہ کا حیران کار ہے

دیکھا نہیں ہے آئنے نے وہ بدن ہنوز

ہر چند باغ دہر میں مدت سے ہوں مقیم

آتشؔ نظر پڑا نہ وہ سیب ذقن ہنوز

josh-o-kharosh par hai bahar-e-chaman hanoz

pite hain naujawan sharab-e-kuhan hanoz

pata nahin main yar ko mel sukhan hanoz

maadum hai kamar ki tarah se dahan hanoz

barson se ro raha hun shab-o-roz-e-muttasil

hanste hain muddaton se mire zakhm-e-tan hanoz

rukhsar-e-yar par nahin aghaz-e-khat abhi

dekha nahin in ankhon ne suraj gahan hanoz

anjam kar ka nahin ata khayal kuchh

ghurbat mein bhule baithe hain yar watan hanoz

alam in abrwun ki kaji ka jo hai so hai

bal kha rahi hai zulf-e-shikan dar shikan hanoz

khilat ki kya umid rakhen asman se ham

us ne to dab rakha hai apna kafan hanoz

alam hijab yar ka ta hal hai wahi

khalwat nashin hai raushni-e-anjuman hanoz

apne safa-e-sina ka hairan kar hai

dekha nahin hai aine ne wo badan hanoz

har chand bagh-e-dahr mein muddat se hun muqim

atish nazar para na wo seb-e-zaqan hanoz