جہاں تلک بھی یہ صحرا دکھائی دیتا ہے

جہاں تلک بھی یہ صحرا دکھائی دیتا ہے

مری طرح سے اکیلا دکھائی دیتا ہے

نہ اتنی تیز چلے سرپھری ہوا سے کہو

شجر پہ ایک ہی پتا دکھائی دیتا ہے

برا نہ مانیے لوگوں کی عیب جوئی کا

انہیں تو دن کا بھی سایا دکھائی دیتا ہے

یہ ایک ابر کا ٹکڑا کہاں کہاں برسے

تمام دشت ہی پیاسا دکھائی دیتا ہے

وہیں پہنچ کے گرائیں گے بادباں اب تو

وہ دور کوئی جزیرہ دکھائی دیتا ہے

وہ الوداع کا منظر وہ بھیگتی پلکیں

پس غبار بھی کیا کیا دکھائی دیتا ہے

مری نگاہ سے چھپ کر کہاں رہے گا کوئی

کہ اب تو سنگ بھی شیشہ دکھائی دیتا ہے

سمٹ کے رہ گئے آخر پہاڑ سے قد بھی

زمیں سے ہر کوئی اونچا دکھائی دیتا ہے

کھلی ہے دل میں کسی کے بدن کی دھوپ شکیبؔ

ہر ایک پھول سنہرا دکھائی دیتا ہے

jahan talak bhi ye sahra dikhai deta hai

miri tarah se akela dikhai deta hai

na itni tez chale sarphiri hawa se kaho

shajar pe ek hi patta dikhai deta hai

bura na maniye logon ki aib joi ka

unhen to din ka bhi saya dikhai deta hai

ye ek abr ka tukra kahan kahan barse

tamam dasht hi pyasa dikhai deta hai

wahin pahunch ke giraenge badban ab to

wo dur koi jazira dikhai deta hai

wo alwida ka manzar wo bhigti palken

pas ghubar bhi kya kya dikhai deta hai

miri nigah se chhup kar kahan rahega koi

ke ab to sang bhi shisha dikhai deta hai

simat ke rah gae akhir pahar se qad bhi

zamin se har koi uncha dikhai deta hai

khuli hai dil mein kisi ke badan ki dhup shakeb

har ek phul sunahra dikhai deta hai