جہاں تک عشق کی توفیق ہے رنگیں بناتے ہیں

جہاں تک عشق کی توفیق ہے رنگیں بناتے ہیں

وہ سنتے ہیں ہم ان کو سر گذشت دل سناتے ہیں

ادھر حق الیقیں ہے اب وہ آتے اب وہ آتے ہیں

ادھر انجم مری اس ذہنیت پر مسکراتے ہیں

شب غم اور مہجوری یہ عالم اور مجبوری

ٹپک پڑتے ہیں آنسو جب وہ ہم کو یاد آتے ہیں

وہیں سے درس حسن و عشق کا آغاز ہوتا ہے

جہاں سے واقعات زندگی ہم بھول جاتے ہیں

ہمیں کچھ عشق کے مفہوم پر ہے تبصرہ کرنا

اک آہ سرد کو عنوان شرح غم بناتے ہیں

بہا کر اشک خوں کھینچی تھیں جو آئینۂ دل میں

ہم ان موہوم تصویروں کو اب رنگیں بناتے ہیں

شباب زندگی جلووں کا اک معصوم نظارہ

ہمیں اے دل وہ افسانے ابھی تک یاد آتے ہیں

jahan tak ishq ki taufiq hai rangin banate hain

wo sunte hain ham un ko sar-e-gazshat dil sunate hain

idhar haq-e-alyaqin hai ab wo ate ab wo ate hain

idhar anjum miri is zehniyyat par muskurate hain

shab-e-gham aur mahjuri ye alam aur majburi

tapak parte hain ansu jab wo ham ko yad ate hain

wahin se dars-e-husn-o-ishq ka aghaz hota hai

jahan se waqiat-e-zindagi ham bhul jate hain

hamen kuchh ishq ke mafhum par hai tabsira karna

ik ah-e-sard ko unwan-e-sharh-e-gham banate hain

baha kar ashk-e-khun khinchi thin jo aina-e-dil mein

ham un mauhum taswiron ko ab rangin banate hain

shabab-e-zindagi jalwon ka ik maasum-e-nazzara

hamen ai dil wo afsane abhi tak yad ate hain