ایک عالم نے جبہ سائی کی

ایک عالم نے جبہ سائی کی

اے بتو تم نے بھی خدائی کی

عاشقوں کے لہو کی پیاسی ہیں

مچھلیاں اس کف حنائی کی

زلف پر پیچ سے جو دل الجھا

بیچ میں رخ پڑا صفائی کی

مرغ بے بال و پر ہوں اے صیاد

آرزو ہے کسی رہائی کی

اے جنوں دشت کو چلیں گے ہم

ہے قسم اس برہنہ پائی کی

سر جدا ہم نے اپنا کر ڈالا

آئی جب گفتگو جدائی کی

پھر گیا یار گھر کے پاس آ کر

بخت برگشتہ نے برائی کی

سیکڑوں جامے تجھ پہ پھٹتے ہیں

دھوم ہے تیری میرزائی کی

تجھ سے تو ہم کو اے خم ابرو

تھی نہ امید کج ادائی کی

کوئی قاتل کی راہ بھولا تھا

اے اجل تو نے رہنمائی کی

دل کہیں اور ہم نے اٹکایا

بے وفاؤں سے بے وفائی کی

نہ گئی زاہدوں کے پاس کبھی

دختر رز نے پارسائی کی

شہر میں جائے گی مری پاپوش

قدر واں کیا برہنہ پائی کی

صاف ہے آئنہ تن پر نور

ہے دلیل اس پہ خود نمائی کی

کاسۂ ماہ کیوں نہ ہو پر نور

برسوں اس کوچے کی گدائی کی

کعبۂ دل میں بھی مقام کیا

اے بتو تم نے کیا رسائی کی

خط کے آنے پہ بھی مکدر ہے

صورت اب کون سی صفائی کی

بال و پر بھی گئے بہار کے ساتھ

اب تو صورت نہیں رہائی کی

کس کے کوچے کی راہ بھولا ہوں

خضر نے بھی نہ رہنمائی کی

شاہ کہلائے ہر طرح سے وزیرؔ

بادشاہی نہ کی گدائی کی

ek alam ne jubba sai ki

ai buto tum ne bhi khudai ki

ashiqon ke lahu ki pyasi hain

machhliyan is kaf-e-hinai ki

zulf pur pech se jo dil uljha

bich mein rukh para safai ki

murgh-e-be bal-o-par hun ai sayyad

arzu hai kisi rihai ki

ai junun dasht ko chalenge ham

hai qasam is barahna pai ki

sar juda ham ne apna kar dala

ai jab guftugu judai ki

phir gaya yar ghar ke pas a kar

bakht-e-bargashta ne burai ki

saikron jame tujh pe phatte hain

dhum hai teri mirzai ki

tujh se to ham ko ai kham-e-abru

thi na ummid kaj adai ki

koi qatil ki rah bhula tha

ai ajal tu ne rahnumai ki

dil kahin aur ham ne atkaya

be wafaon se be wafai ki

na gai zahidon ke pas kabhi

dukhtar-e-raz ne parsai ki

shahr mein jaegi miri paposh

qadr wan kya barahna pai ki

saf hai aina tan pur nur

hai dalil us pe khud numai ki

kasa-e-mah kyun na ho pur nur

barson us kuche ki gadai ki

kaaba-e-dil mein bhi maqam kiya

ai buto tum ne kya rasai ki

khat ke ane pe bhi mukaddar hai

surat ab kaun si safai ki

bal-o-par bhi gae bahar ke sath

ab to surat nahin rihai ki

kis ke kuche ki rah bhula hun

khizr ne bhi na rahnumai ki

shah kahlae har tarah se wazir

badshahi na ki gadai ki