جی چاہے گا جس کو اسے چاہا نہ کریں گے

جی چاہے گا جس کو اسے چاہا نہ کریں گے

ہم عشق و ہوس کو کبھی یکجا نہ کریں گے

اے کاش چھٹیں عہد شکن بن کے جہاں میں

باز آئے وفاداری کا دعویٰ نہ کریں گے

گو حسن پرستی نہ ہو خاطر سے فراموش

خوش قامتوں کا یاد سراپا نہ کریں گے

نرگس کی شب تیرہ میں لوٹیں گے بہاریں

پر سرمگیں آنکھوں کی تمنا نہ کریں گے

بہلائیں گے سیر گل و شبنم سے دل اپنا

اس عارض گل رنگ کی پروا نہ کریں گے

انگاروں پہ لوٹیں گے پر ان شعلہ رخوں کے

نظارہ سے ہم آنکھ بھی سینکا نہ کریں گے

عصمت کا انہیں خوف ہے تقویٰ کا ہمیں پاس

نے کی ہے کبھی خواہش بے جا نہ کریں گے

بکنے کے شہیدیؔ کے برا مانیو مت جان

ہیں عاشق صادق کبھی ایسا نہ کریں گے

ji chahega jis ko use chaha na karenge

ham ishq-o-hawas ko kabhi yakja na karenge

ai kash chhuten ahd shikan ban ke jahan mein

baz ae wafadari ka daawa na karenge

go husn parasti na ho khatir se faramosh

khush qamaton ka yad sarapa na karenge

nargis ki shab-e-tira mein lautenge baharen

par surmagin ankhon ki tamanna na karenge

bahlaenge sair-e-gul-o-shabnam se dil apna

is ariz-e-gul rang ki parwa na karenge

angaron pe lautenge par un shola rukhon ke

nazara se ham ankh bhi senka na karenge

ismat ka unhen khauf hai taqwa ka hamen pas

ne ki hai kabhi khwahish be ja na karenge

bikne ke shahidi ke bura maniyo mat jan

hain ashiq-e-sadiq kabhi aisa na karenge