جی لیتی ہے وہ زلف سیہ فام ہمارا

جی لیتی ہے وہ زلف سیہ فام ہمارا

بجھتا ہے چراغ آج سر شام ہمارا

ایسا کوئی گمنام زمانے میں نہ ہوگا

گم ہو وہ نگیں جس پہ کھدے نام ہمارا

اول تو نہ قاصد کو رہے کوئے صنم یاد

پہنچے تو فراموش ہو پیغام ہمارا

ہم گو کہ ہیں دیوانے مگر غرق یم اشک

یونان کے مانند ہوا نام ہمارا

مے پائی نہ پینے کو تو ہم پی گئے آنسو

اشکوں سے بھی ساقی نہ بھرا جام ہمارا

کعبے میں بھی وحشت کی رہی دست درازی

صد چاک کیا جامۂ احرام ہمارا

طفلی میں تھی اک دایہ ہیں اب چار کے کاندھے

آغاز سے کیا خوب ہے انجام ہمارا

اک آدھ رہے جسم مشبک میں ترا تیر

خالی نہ کبھی صید سے ہو دام ہمارا

کام اوروں کے جاری رہیں ناکام رہیں ہم

اب آپ کی سرکار میں کیا کام ہمارا

ناسخؔ کہیں جلد آ کے کہیں قاصد جاناں

خط لیجئے دلوایئے انعام ہمارا

ji leti hai wo zulf-e-siyah fam hamara

bujhta hai charagh aj sar-e-sham hamara

aisa koi gumnam zamane mein na hoga

gum ho wo nagin jis pe khade nam hamara

awwal to na qasid ko rahe ku-e-sanam yad

pahunche to faramosh ho paigham hamara

ham go ke hain diwane magar gharq-e-yam ashk

yunan ke manind hua nam hamara

mai pai na pine ko to ham pi gae ansu

ashkon se bhi saqi na bhara jam hamara

kaabe mein bhi wahshat ki rahi dast-e-darazi

sad chak kiya jama-e-ehram hamara

tifli mein thi ik daya hain ab char ke kandhe

aghaz se kya khub hai anjam hamara

ik adh rahe jism mushabbak mein tira tir

khali na kabhi said se ho dam hamara

kam auron ke jari rahen nakam rahen ham

ab ap ki sarkar mein kya kam hamara

nasikh kahin jald a ke kahin qasid janan

khat lijiye dalwaiye inam hamara