جی میں ہے یاد رخ و زلف سیہ فام بہت

جی میں ہے یاد رخ و زلف سیہ فام بہت

رونا آتا ہے مجھے ہر سحر و شام بہت

دست صیاد تلک بھی نہ میں پہنچا جیتا

بے قراری نے لیا مجھ کو تہ دام بہت

ایک دو چشمک ادھر گردش ساغر کہ مدام

سر چڑھی رہتی ہے یہ گردش ایام بہت

دل خراشی و جگر چاکی و خوں افشانی

ہوں تو ناکام پہ رہتے ہیں مجھے کام بہت

رہ گیا دیکھ کے تجھ چشم پہ یہ سطر مژہ

ساقیا یوں تو پڑھے تھے میں خط جام بہت

پھر نہ آئے جو ہوئے خاک میں جا آسودہ

غالباً زیر زمیں میرؔ ہے آرام بہت

ji mein hai yad rukh-o-zulf-e-siyah fam bahut

rona ata hai mujhe har sahar-o-sham bahut

dast-e-sayyad talak bhi na main pahuncha jita

be qarari ne liya mujh ko tah-e-dam bahut

ek do chashmak idhar gardish-e-saghar ke mudam

sar charhi rahti hai ye gardish-e-ayyam bahut

dil kharashi-o-jigar chaki-o-khun afshani

hun to nakam pe rahte hain mujhe kam bahut

rah gaya dekh ke tujh chashm pe ye satr-e-mizha

saqiya yun to parhe the main khat-e-jam bahut

phir na ae jo hue khak mein ja asuda

ghaliban zer-e-zamin mir hai aram bahut