جی میں چہلیں تھیں جو کچھ سو تو گئیں یار کے ساتھ

جی میں چہلیں تھیں جو کچھ سو تو گئیں یار کے ساتھ

سر پٹکنا ہی پڑا اب در و دیوار کے ساتھ

اک ہمیں خار تھے آنکھوں میں سبھوں کی سو چلے

بلبلو خوش رہو اب تم گل و گلزار کے ساتھ

خار مردود چمن مجھ کو کیا روز ازل

جن نے بھیجا ہے تجھے گونۂ گلزار کے ساتھ

میں دوانا ہوں صدا کا مجھے مت قید کرو

جی نکل جائے گا زنجیر کی جھنکار کے ساتھ

یارو کہتے تھے جو تم لالہ و گل ہے سو کہاں

سر پٹکنے تو نہ آیا تھا میں کہسار کے ساتھ

ہائے صیاد یہ انصاف سے تیرے ہے بعید

یاں تلک کیجے ستم اپنے گرفتار کے ساتھ

گرچہ بلبل ہوں میں قائمؔ ولے اس باغ کے بیچ

فرق کوئی نہ کرے گل کو جہاں خار کے ساتھ

ji mein chahlen thin jo kuchh so to gain yar ke sath

sar patakna hi para ab dar-o-diwar ke sath

ik hamen khar the ankhon mein sabhon ki so chale

bulbulo khush raho ab tum gul-o-gulzar ke sath

khar mardud-e-chaman mujh ko kiya roz-e-azal

jin ne bheja hai tujhe guna-e-gulzar ke sath

main dawana hun sada ka mujhe mat qaid karo

ji nikal jaega zanjir ki jhankar ke sath

yaro kahte the jo tum lala-o-gul hai so kahan

sar patakne to na aya tha main kohsar ke sath

hae sayyad ye insaf se tere hai baid

yan talak kije sitam apne giraftar ke sath

garche bulbul hun main qaim wale is bagh ke bich

farq koi na kare gul ko jahan khar ke sath