جہاں تجھ کو بٹھا کر پوجتے ہیں پوجنے والے

جہاں تجھ کو بٹھا کر پوجتے ہیں پوجنے والے

وہ مندر اور ہوتے ہیں شوالے اور ہوتے ہیں

دہان زخم سے کہتے ہیں جن کو مرحبا بسمل

وہ خنجر اور ہوتے ہیں وہ بھالے اور ہوتے ہیں

جنہیں محرومیٔ تاثیر ہی اصل تمنا ہے

وہ آہیں اور ہوتی ہیں وہ نالے اور ہوتے ہیں

جنہیں حاصل ہے تیرا قرب خوش قسمت سہی لیکن

تری حسرت لیے مر جانے والے اور ہوتے ہیں

جو ٹھوکر ہی نہیں کھاتے وہ سب کچھ ہیں مگر واعظ

وہ جن کو دست رحمت خود سنبھالے اور ہوتے ہیں

تلاش شمع سے پیدا ہے سوز ناتمام اخترؔ

خود اپنی آگ میں جل جانے والے اور ہوتے ہیں

jahan tujh ko bitha kar pujte hain pujne wale

wo mandir aur hote hain shoille aur hote hain

dahan-e-zakhm se kahte hain jin ko marhaba bismil

wo khanjar aur hote hain wo bhale aur hote hain

jinhen mahrumi-e-tasir hi asl-e-tamanna hai

wo ahen aur hoti hain wo nale aur hote hain

jinhen hasil hai tera qurb-e-khush qismat sahi lekin

tiri hasrat liye mar jane wale aur hote hain

jo thokar hi nahin khate wo sab kuchh hain magar waiz

wo jin ko dast-e-rahmat khud sambhale aur hote hain

talash-e-shama se paida hai soz-e-natamam akhtar

khud apni ag mein jal jane wale aur hote hain