جو پوچھا منہ دکھانے آپ کب چلمن سے نکلیں گے

جو پوچھا منہ دکھانے آپ کب چلمن سے نکلیں گے

تو بولے آپ جس دن حشر میں مدفن سے نکلیں گے

جلے گا دل تمہیں بزم عدو میں دیکھ کر میرا

دھواں بن بن کے ارماں محفل دشمن سے نکلیں گے

اکٹھے کر کے تیری دوسری تصویر کھینچوں گا

وہ سب جلوے جو چھن چھن کر تری چلمن سے نکلیں گے

سیہ پوشاک دوش ناز پر بکھری ہوئی زلفیں

مرے ماتم کی شرکت کو بڑے جوبن سے نکلیں گے

ہمیں پروا نہیں اس کی قیامت لاکھ بار آئے

نہ تم مدفن پہ آؤ گے نہ ہم مدفن سے نکلیں گے

ترے دامن سے بدلا لیں گے ظالم خون ناحق کا

وہ فوارے لہو کے جو مری گردن سے نکلیں گے

یہی رشتہ جنون عاشقی کا ہے تو کچھ دن میں

مرے تار گریباں یار کے دامن سے نکلیں گے

ہزاروں حسن والے اس زمیں میں دفن ہیں مضطرؔ

قیامت ہوگی جب یہ سب کے سب مدفن سے نکلیں گے

jo puchha munh dikhane ap kab chilman se niklenge

tu bole ap jis din hashr mein madfan se niklenge

jalega dil tumhen bazm-e-adu mein dekh kar mera

dhuan ban ban ke arman mahfil dushman se niklenge

ikatthe kar ke teri dusri taswir khinchunga

wo sab jalwe jo chhin chhin kar tiri chilman se niklenge

siyah poshak dosh-e-naz par bikhri hui zulfen

mire matam ki shirkat ko bare joban se niklenge

hamen parwa nahin us ki qayamat lakh bar ae

na tum madfan pe aoge na ham madfan se niklenge

tire daman se badla lenge zalim khun-e-nahaq ka

wo faware lahu ke jo miri gardan se niklenge

yahi rishta junun-e-ashiqi ka hai to kuchh din mein

mire tar-e-gareban yar ke daman se niklenge

hazaron husn wale is zamin mein dafn hain muztar

qayamat hogi jab ye sab ke sab madfan se niklenge