جو نظر کیا میں صفات میں ہوا مجھ پہ کب یہ عیاں نہیں

جو نظر کیا میں صفات میں ہوا مجھ پہ کب یہ عیاں نہیں

مری ذات عین کی عین ہے وہاں دوسری کا نشاں نہیں

وہی دو جہاں میں ہے مفتخر جیسے عینیت کی ہوئی خبر

وہی حکمراں ہے جہان میں وہاں کفر و دیں کا گماں نہیں

رہے غیریت کے حجاب میں جو خدا نما سے نہیں ملے

جو خدا کو ان سے طلب کئے رہی بات ان پہ نہاں نہیں

جسے ہو ثبوت وجود کا وہی حق شناس ہے با خبر

انہیں جملہ آوے خدا نظر وہ خدا کو دیکھے کہاں نہیں

میں وطن میں آپ سفر کیا جو قدم کو اپنی نظر کیا

ملا اپنا آپ پتہ مجھے جہاں غیریت کا بیاں نہیں

میں تو ایک مرکزؔ دہر ہوں جو خدا نما کے نشان سے

جو بتاؤں حق کا پتہ جسے رہے باقی اس کو گماں نہیں

jo nazar kiya main sifat mein hua mujh pe kab ye ayan nahin

miri zat ain ki ain hai wahan dusri ka nishan nahin

wahi do jahan mein hai muftakhar jaise ainyat ki hui khabar

wahi hukmaran hai jahan mein wahan kufr-o-din ka guman nahin

rahe ghairiyyat ke hijab mein jo khuda numa se nahin mile

jo khuda ko un se talab kiye rahi bat un pe nihan nahin

jise ho subut wajud ka wahi haq shanas hai ba khabar

unhen jumla awe khuda nazar wo khuda ko dekhe kahan nahin

main watan mein ap safar kiya jo qadam ko apni nazar kiya

mila apna ap pata mujhe jahan ghairiyyat ka bayan nahin

main to ek markaz-e-dahr hun jo khuda numa ke nishan se

jo bataun haq ka pata jise rahe baqi us ko guman nahin