جو مہندی کا بٹنا ملا کیجئے گا

جو مہندی کا بٹنا ملا کیجئے گا

پسینے کو عطر حنا کیجئے گا

ستم کیجئے گا جفا کیجئے گا

یہی ہوگا اور آپ کیا کیجئے گا

پھڑک کر نکل جائے گا دم ہمارا

قفس سے جو ہم کو رہا کیجئے گا

جو کہتا ہوں اچھا نہیں ظلم کرنا

تو کہتے ہیں وہ آپ کیا کیجئے گا

قیامت میں دیدار کا کب یقیں ہے

یوں ہی لن ترانی سنا کیجئے گا

کہا حال دل تو وہ یہ کہہ کے اٹھے

میں جاتا ہوں بیٹھے بکا کیجئے گا

شہنشاہ کہتے ہیں ان کے گدا سے

ہمارے لیے بھی دعا کیجئے گا

گلوں کا وہی پیرہن ہوگا صاحب

عنایت جو اپنی قبا کیجئے گا

کنارہ بھلا تم سے اے بحر خوبی

ڈبونے ہی کو آشنا کیجئے گا

منجم نے ہاتھ ان کے دیکھے تو بولا

گلوں کی قبا کو قبا کیجئے گا

مری جان کے مدعی آپ ہوں گے

سماعت اگر مدعا کیجئے گا

بہت ناز پروردہ ہے دل ہمارا

ذرا لطف اس پر کیا کیجئے گا

نہ دیوانہ بنتے جو معلوم ہوتا

پری بن کے ہم سے اڑا کیجئے گا

بتو برق ہیں درد مندوں کی آہیں

خدا کے غضب سے ڈرا کیجئے گا

بہت فیض بخشی کا سنتے ہیں شہرا

ہماری بھی حاجت روا کیجئے گا

خدا کے لیے میرزا مہرؔ صاحب

بتوں پر کہاں تک مٹا کیجئے گا

jo mehndi ka batna mila kijiye ga

pasine ko itr-e-hina kijiye ga

sitam kijiye ga jafa kijiye ga

yahi hoga aur ap kya kijiye ga

pharak kar nikal jaega dam hamara

qafas se jo ham ko raha kijiye ga

jo kahta hun achchha nahin zulm karna

tu kahte hain wo ap kya kijiye ga

qayamat mein didar ka kab yaqin hai

yun hi lan tarani suna kijiye ga

kaha hal-e-dil to wo ye kah ke uthe

main jata hun baithe buka kijiye ga

shahanshah kahte hain un ke gada se

hamare liye bhi dua kijiye ga

gulon ka wahi pairahan hoga sahab

inayat jo apni qaba kijiye ga

kinara bhala tum se ai bahr-e-khubi

dubone hi ko ashna kijiye ga

munajjam ne hath un ke dekhe to bola

gulon ki qaba ko qaba kijiye ga

miri jan ke muddai ap honge

samaat agar muddaa kijiye ga

bahut naz parwarda hai dil hamara

zara lutf us par kiya kijiye ga

na diwana bante jo maalum hota

pari ban ke ham se ura kijiye ga

buto barq hain dard mandon ki ahen

khuda ke ghazab se dara kijiye ga

bahut faiz bakhshi ka sunte hain shahra

hamari bhi hajat rawa kijiye ga

khuda ke liye mirza mehr sahab

buton par kahan tak mita kijiye ga