جو میرے تنگنائے دل میں تجھ کو جلوہ گر دیکھا

جو میرے تنگنائے دل میں تجھ کو جلوہ گر دیکھا

مری نظروں نے حیرت سے مجھی کو عمر بھر دیکھا

تصور کی حدوں میں بھی سمانا جن کا مشکل تھا

نظر والوں نے ان جلووں کو تا حد نظر دیکھا

سب اپنے دل میں اک تیر نظر محسوس کرتے ہیں

مگر کوئی بتا سکتا نہیں اس نے کدھر دیکھا

تعین بر طرف مقصود مجھ کو سجدہ کرنا تھا

نہ ہم نے رہ گزر دیکھی نہ ہم نے سنگ در دیکھا

نظر آتا نہ تھا جو گرد افکار و حوادث میں

وہ ساحل آنکھ نے طوفان غم میں ڈوب کر دیکھا

تمہارے سنگ در کو سنگ در میں کس طرح سمجھوں

کہ جب سجدہ کیا سر کو جبین عرش پر دیکھا

عجب منزل تھی اے سیمابؔ اپنی منزل ہستی

نہ موقع تھا ٹھہرنے کا نہ یارائے سفر دیکھا

jo mere tangnae dil mein tujh ko jalwa gar dekha

miri nazron ne hairat se mujhi ko umr bhar dekha

tasawwur ki hadon mein bhi samana jin ka mushkil tha

nazar walon ne in jalwon ko ta had-e-nazar dekha

sab apne dil mein ik tir-e-nazar mahsus karte hain

magar koi bata sakta nahin us ne kidhar dekha

taayyun bar taraf maqsud mujh ko sajda karna tha

na ham ne rah guzar dekhi na ham ne sang-e-dar dekha

nazar ata na tha jo gard-e-afkar-o-hawadis mein

wo sahil ankh ne tufan-e-gham mein dub kar dekha

tumhare sang-e-dar ko sang-e-dar mein kis tarah samjhun

ke jab sajda kiya sar ko jabin-e-arsh par dekha

ajab manzil thi ai simab apni manzil-e-hasti

na mauqaa tha thaharne ka na yara-e-safar dekha