جو حروف لکھ گیا تھا مری آرزو کا بچپن

جو حروف لکھ گیا تھا مری آرزو کا بچپن

انہیں دھو سکے نہ دل سے مری زندگی کے ساون

وہ جو دن بکھر چکے ہیں وہ جو خواب مر چکے ہیں

میں انہی کا ہوں مجاور مرا دل انہی کا مدفن

یہی ایک آرزو تھی کہ مجھے کوئی پکارے

سو پکارتی ہے اب تک مجھے اپنے دل کی دھڑکن

کوئی ٹوٹتا ستارہ مجھے کاش پھر صدا دے

کہ یہ کوہ و دشت و صحرا ہیں سکوت شب سے روشن

تری منزل وفا میں ہوا خود سے آشنا میں

تری یاد کا کرم ہے کہ یہی ہے دوست دشمن

ترے روبرو ہوں لیکن نہیں روشناس تجھ سے

تجھے دیکھنے نہ دے گی ترے دیکھنے کی الجھن

ظفرؔ آج دل کا عالم ہے عجب میں کس سے پوچھوں

وہ صبا کدھر سے آئی جو کھلا گئی یہ گلشن

jo huruf likh gaya tha miri arzu ka bachpan

unhen dho sake na dil se miri zindagi ke sawan

wo jo din bikhar chuke hain wo jo khwab mar chuke hain

main unhi ka hun mujawir mira dil unhi ka madfan

yahi ek arzu thi ke mujhe koi pukare

so pukarti hai ab tak mujhe apne dil ki dharkan

koi tutta sitara mujhe kash phir sada de

ke ye koh-o-dasht-o-sahra hain sukut-e-shab se raushan

tiri manzil-e-wafa mein hua khud se ashna mein

tiri yad ka karam hai ke yahi hai dost dushman

tire rubaru hun lekin nahin rushanas tujh se

tujhe dekhne na degi tire dekhne ki uljhan

zafar aj dil ka alam hai ajab mein kis se puchhun

wo saba kidhar se ai jo khula gai ye gulshan