جو دیکھو مرے شعر تر کی طرف

جو دیکھو مرے شعر تر کی طرف

تو مائل نہ ہو پھر گہر کی طرف

کوئی داد دل آہ کس سے کرے

ہر اک ہے سو اس فتنہ گر کی طرف

محبت نے شاید کہ دی دل کو آگ

دھواں سا ہے کچھ اس نگر کی طرف

لگیں ہیں ہزاروں ہی آنکھیں ادھر

اک آشوب ہے اس کے گھر کی طرف

بہت رنگ ملتا ہے دیکھو کبھو

ہماری طرف سے سحر کی طرف

بہ خود کس کو اس تاب رخ نے رکھا

کرے کون شمس و قمر کی طرف

نہ سمجھا گیا ابر کیا دیکھ کر

ہوا تھا مری چشم تر کی طرف

ٹپکتا ہے پلکوں سے خوں متصل

نہیں دیکھتے ہم جگر کی طرف

مناسب نہیں حال عاشق سے صبر

رکھے ہے یہ دارو ضرر کی طرف

کسے منزل دل کش دہر میں

نہیں میل خاطر سفر کی طرف

رگ جاں کب آتی ہے آنکھوں میں میرؔ

گئے ہیں مزاج اس کمر کی طرف

jo dekho mire sher-e-tar ki taraf

tu mail na ho phir guhar ki taraf

koi dad-e-dil ah kis se kare

har ik hai so is fitna gar ki taraf

mohabbat ne shayad ke di dil ko ag

dhuan sa hai kuchh is nagar ki taraf

lagen hain hazaron hi ankhen idhar

ik ashob hai us ke ghar ki taraf

bahut rang milta hai dekho kabhu

hamari taraf se sahar ki taraf

ba khud kis ko is tab-e-rukh ne rakha

kare kaun shams-o-qamar ki taraf

na samjha gaya abr kya dekh kar

hua tha miri chashm-e-tar ki taraf

tapakta hai palkon se khun muttasil

nahin dekhte ham jigar ki taraf

munasib nahin hal-e-ashiq se sabr

rakhe hai ye daru zarar ki taraf

kise manzil-e-dil kash dahr mein

nahin mel-e-khatir safar ki taraf

rag-e-jan kab ati hai ankhon mein mir

gae hain mizaj is kamar ki taraf