جو رقیبوں نے کہا تو وہی بد ظن سمجھا

جو رقیبوں نے کہا تو وہی بد ظن سمجھا

دوست افسوس نہ سمجھا مجھے دشمن سمجھا

ناتواں وہ ہوں کہ بستر پہ مجھے دیکھ کے آہ

تار بستر کوئی سمجھا کوئی سوزن سمجھا

تیغ قاتل جو محبت سے لگی آ کے گلے

تاب کو اس کی میں اپنی رگ گردن سمجھا

اپنے پاجامۂ کمخواب کی ہر بوٹی کو

شمع رو شب کو چراغ تہہ دامن سمجھا

سرعت ابلق ایام سے غافل تھا آہ

دم آخر میں اسے عمر کا توسن سمجھا

خار صحرا سے چھدی جب کف پا مجنوں کی

خاک بیزی کو وہ غربال کا روزن سمجھا

کمر یار کا ازبسکہ جو رہتا ہے خیال

دل کو میں چینیٔ مو دار کا برتن سمجھا

گل کو معلوم نہ تھی ہستئ فانی اپنی

اے نسیم سحری وقت شگفتن سمجھا

بستر گل سے منقش جو ہوا اس کا بدن

تن نازک پہ وہ پھلکاری کی چپکن سمجھا

جیتے جی چاہئے ہے عاقبت کار کی فکر

فائدہ کیا اگر انساں پس مردن سمجھا

میرزائی کو نہ فریاد نے چھوڑا تا مرگ

جیغۂ سر تجھے اے تیشۂ آہن سمجھا

عکس افگن ہے ترے ساغر صہبا میں یہ زلف

تو عبث اے بت مے کش اسے ناگن سمجھا

سایۂ زلف نے اس کے یہ دیا دھوکا رات

چلنے والوں نے جسے افعی رہزن سمجھا

چشم نے اپنی طرف سے تو سجھائی تھی نصیرؔ

دل نہ پر اس ستم ایجاد کی چتون سمجھا

jo raqibon ne kaha to wahi bad zan samjha

dost afsos na samjha mujhe dushman samjha

natawan wo hun ke bistar pe mujhe dekh ke ah

tar-e-bistar koi samjha koi sozan samjha

tegh-e-qatil jo mohabbat se lagi a ke gale

tab ko us ki main apni rag-e-gardan samjha

apne pajama-e-kamkhwab ki har boti ko

shama ro shab ko charagh-e-tah-e-daman samjha

surat ablaq-e-ayyam se ghafil tha ah

dam-e-akhir mein use umr ka tosun samjha

khar-e-sahra se chhidi jab kaf-e-pa majnun ki

khak bezi ko wo ghirbal ka rauzan samjha

kamar-e-yar ka azbaskeh jo rahta hai khayal

dil ko main chini-e-mu dar ka bartan samjha

gul ko maalum na thi hasti-e-fani apni

ai nasim-e-sahari waqt shagfatan samjha

bistar-e-gul se munaqqash jo hua us ka badan

tan-e-nazuk pe wo phalkari ki chapkan samjha

jite ji chahiye hai aqibat kar ki fikr

faida kya agar insan pas murdan samjha

mirzai ko na fariyad ne chhora ta marg

jigha-e-sar tujhe ai tesha-e-ahan samjha

aks afgan hai tire saghar-e-sahba mein ye zulf

tu abas ai but-e-mai kash use nagin samjha

saya-e-zulf ne us ke ye diya dhoka rat

chalne walon ne jise afi rahzan samjha

chashm ne apni taraf se to sujhai thi nasir

dil na par us sitam ijad ki chitwan samjha