جو روئیں درد دل سے تلملا کر

جو روئیں درد دل سے تلملا کر

تو وہ ہنستا ہے کیا کیا کھلکھلا کر

یہی دیکھا کہ اٹھوائے گئے بس

جو دیکھا ٹک ادھر کو آنکھ اٹھا کر

بھلا دیکھیں یہ کن آنکھوں سے کیوں جی

کسی کو دیکھنا ہم کو دکھا کر

کھڑا رہنے نہ دیں وو اب کہ جو شخص

اٹھاتے تھے مزے ہم کو بٹھا کر

گیا وو دل بھی پہلو سے کہ جس کو

کبھی روتے تھے چھاتی سے لگا کر

چلی جاتی ہے تو اے عمر رفتہ

یہ ہم کو کس مصیبت میں پھنسا کر

خط آیا واں سے ایسا جس سے اپنا

نوشتہ خوب سمجھے ہم پڑھا کر

ابھی گھر سے نہیں نکلا وہ تس پر

چلا گھر بار اک عالم لٹا کر

دیا دھڑکا اسے کچھ وصل میں ہائے

بگاڑی بات گردوں نے بنا کر

محبت ان دنو جو گھٹ گئی واں

تو کچھ پاتے نہیں اس پاس جا کر

مگر ہم شوق کے غلبے سے ہر بار

خجل ہوتے ہیں ہاتھ اپنا بڑھا کر

نہیں منہ سے نکلتی اس کے کچھ بات

کسی نے کیا کہا جرأتؔ سے آ کر

jo roen dard-e-dil se tilmila kar

to wo hansta hai kya kya khulkhula kar

yahi dekha ke uthwae gae bas

jo dekha tuk idhar ko ankh utha kar

bhala dekhen ye kin ankhon se kyun ji

kisi ko dekhna ham ko dikha kar

khara rahne na den wo ab ke jo shakhs

uthate the maze ham ko bitha kar

gaya wo dil bhi pahlu se ke jis ko

kabhi rote the chhati se laga kar

chali jati hai to ai umr-e-rafta

ye ham ko kis musibat mein phansa kar

khat aya wan se aisa jis se apna

nawashta khub samjhe ham parha kar

abhi ghar se nahin nikla wo tis par

chala ghar bar ik alam luta kar

diya dharka use kuchh wasl mein hae

bigari bat gardun ne bana kar

mohabbat un dino jo ghut gai wan

to kuchh pate nahin is pas ja kar

magar ham shauq ke ghalbe se har bar

khajil hote hain hath apna barha kar

nahin munh se nikalti us ke kuchh bat

kisi ne kya kaha jurat se a kar