جنوں کی راکھ سے منزل میں رنگ کیا آئے

جنوں کی راکھ سے منزل میں رنگ کیا آئے

متاع درد تو ہم راہ میں لٹا آئے

وہ گرد اڑائی کسی نے کہ سانس گھٹنے لگی

ہٹے یہ راہ سے دیوار تو ہوا آئے

کسی مقام تمنا سے جب بھی پلٹے ہیں

ہمارے سامنے اپنے ہی نقش پا آئے

نمو کے بوجھ سے شاخیں نہ ٹوٹ جائیں کہیں

تم آؤ تو کوئی غنچہ کھلے صبا آئے

یہ دل کی پیاس یہ دنیا کے فاصلے باقیؔ

بہت قریب سے اب تو کوئی صدا آئے

junun ki rakh se manzil mein rang kya ae

mata-e-dard to ham rah mein luta ae

wo gard urai kisi ne ke sans ghatne lagi

hate ye rah se diwar to hua ae

kisi maqam-e-tamanna se jab bhi palte hain

hamare samne apne hi naqsh-e-pa ae

numu ke bojh se shakhen na tut jaen kahin

tum ao to koi ghuncha khule saba ae

ye dil ki pyas ye duniya ke fasle baqi

bahut qarib se ab to koi sada ae