جنوں کی فصل آئی بڑھ گئی توقیر پتھر کی

جنوں کی فصل آئی بڑھ گئی توقیر پتھر کی

سر شوریدہ خود کرنے لگا تدبیر پتھر کی

یہ مشکل کس طرح حل ہو نہیں شمشیر پتھر کی

دل صیاد پتھر گردن نخچیر پتھر کی

بنا آئینہ چمکی کس قدر تقدیر پتھر کی

تمہارے روبرو آیا زہے توقیر پتھر کی

ہمارے جوش وحشت نے یہ ہم کو رنگ دکھلایا

نہ کچھ تقصیر لڑکوں کی نہ کچھ تقصیر پتھر کی

نشاں کچھ آپ بھی کر دیں ہوا دفن آپ کا مجنوں

پئے تاریخ رحلت کیجیے تدبیر پتھر کی

رگوں میں میری پیشانی کی جوش خوں ہوا پیدا

حکایت لکھ چکا جب کاتب تقدیر پتھر کی

جو تو سمجھے تو میرے تیرے دل کی ایک صورت ہے

یہ ہے تصویر مٹی کی وہ ہے تصویر پتھر کی

نہ جس میں لفظ و معنی ہوں کلام اس کو نہیں کہتے

چٹکنا پتھروں کا کب ہوئی تقریر پتھر کی

ترا سودا جہاں پر تھا رسائی ہو گئی واں تک

پڑا سر پر ہمارے لڑ گئی تقدیر پتھر کی

لگایا سنگ اپنے ہاتھ سے تو نے مرے سر پر

خوشا تقدیر میری اور زہے تقدیر پتھر کی

قسم لوگو ادب سے آنکھ اٹھا کے میں نے دیکھا ہو

تمہارے در میں لوہے کی ہے یا زنجیر پتھر کی

دل سخت اے رشیدؔ زار اپنا ہے گراں ہم کو

بجا ہے کس طرح بھاری نہ ہو تصویر پتھر کی

junun ki fasl ai barh gai tauqir patthar ki

sar-e-shorida khud karne laga tadbir patthar ki

ye mushkil kis tarah hal ho nahin shamshir patthar ki

dil-e-sayyad patthar gardan-e-nakhchir patthar ki

bana aina chamki kis qadar taqdir patthar ki

tumhare rubaru aya zahe tauqir patthar ki

hamare josh-e-wahshat ne ye ham ko rang dikhlaya

na kuchh taqsir larkon ki na kuchh taqsir patthar ki

nishan kuchh ap bhi kar den hua dafn ap ka majnun

piye tarikh rehlat kijiye tadbir patthar ki

ragon mein meri peshani ki josh-e-khun hua paida

hikayat likh chuka jab katib-e-taqdir patthar ki

jo tu samjhe to mere tere dil ki ek surat hai

ye hai taswir mitti ki wo hai taswir patthar ki

na jis mein lafz-o-maani hun kalam us ko nahin kahte

chatakna pattharon ka kab hui taqrir patthar ki

tira sauda jahan par tha rasai ho gai wan tak

para sar par hamare lar gai taqdir patthar ki

lagaya sang apne hath se tu ne mire sar par

khusha taqdir meri aur zahe taqdir patthar ki

qasam logo adab se ankh utha ke main ne dekha ho

tumhare dar mein lohe ki hai ya zanjir patthar ki

dil sakht ai rashid-e-zar apna hai giran ham ko

baja hai kis tarah bhari na ho taswir patthar ki