جنبش ابروئے قاتل کبھی ایسی تو نہ تھی

جنبش ابروئے قاتل کبھی ایسی تو نہ تھی

بلبل جاں مری بسمل کبھی ایسی تو نہ تھی

وعدۂ وصل کیا کس نے دیا دم کس نے

بے قراری تجھے اے دل کبھی ایسی تو نہ تھی

اے شہ حسن رقیب آپ کا قادر نکلا

فوج عشاق کی بیدل کبھی ایسی تو نہ تھی

مہرباں آئے کدھر آج کدھر نکلا چاند

رشک افلاک یہ محفل کبھی ایسی تو نہ تھی

وہ مہ نو مگر آیا کسی مہتابی پر

چاندنی اے مہ کامل کبھی ایسی تو نہ تھی

اپنے کاشانے سے کیوں غیر کے گھر ہو آئے

ماہ رو آپ کی منزل کبھی ایسی تو نہ تھی

کس طرح وصل ہوا اس گل زیبا سے نسیمؔ

خوش نصیبی مجھے حاصل کبھی ایسی تو نہ تھی

jumbish-e-abru-e-qatil kabhi aisi to na thi

bulbul jan miri bismil kabhi aisi to na thi

waada-e-wasl kiya kis ne diya dam kis ne

be qarari tujhe ai dil kabhi aisi to na thi

ai shah-e-husn raqib ap ka qadir nikla

fauj ushshaq ki bedil kabhi aisi to na thi

mehrban ae kidhar aj kidhar nikla chand

rashk-e-aflak ye mahfil kabhi aisi to na thi

wo mah-e-nau magar aya kisi mahtabi par

chandni ai mah-e-kamil kabhi aisi to na thi

apne kashane se kyun ghair ke ghar ho ae

mah ru ap ki manzil kabhi aisi to na thi

kis tarah wasl hua us gul-e-zeba se nasim

khush nasibi mujhe hasil kabhi aisi to na thi