جو بھر لیں ایک چٹکی صاحب تاثیر مٹی کی

جو بھر لیں ایک چٹکی صاحب تاثیر مٹی کی

ابھی شرمندۂ تاثیر ہو اکسیر مٹی کی

بنا کر آدمی کیوں آب و گل میں عشق کو ڈالا

نکالی ہے خدا نے یہ نئی تعزیر مٹی کی

ہماری قبر پر بھی اک ہجوم بے کسی ہوگا

دکھا دیں گے پس مردن تجھے توقیر مٹی کی

زمین کوچۂ دلدار نے کیا پاؤں پکڑے ہیں

ملی دیوانگان عشق کو زنجیر مٹی کی

رہے گا ٹوٹ کر بھی خانۂ دل عالم حسرت

اسے بھی آپ سمجھے ہیں مگر تعمیر مٹی کی

یہی مٹی ہے جس سے سب بنائے جاتے ہیں یا رب

بتوں میں کیوں بدل جاتی ہے پھر تاثیر مٹی کی

وہ کشتہ ہوں کہ روئے خاک پر بھی آ گئی سرخی

خوشی سے شکل بدلی ہے دم تکبیر مٹی کی

جنون عشق میں تیرے زمانہ خاک برسر ہے

بڑھی ہے ان دنوں توقیر سے توقیر مٹی کی

زباں دی تھی خدا نے بولنے کے واسطے لیکن

بنایا ناز و تمکیں نے تمہیں تصویر مٹی کی

کہاں سیل حوادث میں پتا ہم خاکساروں کا

کہیں ٹھہری ہے روئے آب پر تعمیر مٹی کی

مسلط خاکیوں پر کیوں کیا ہے چرخ کو یا رب

نہ تھا مقبول عذر اس کا تو کیا تقصیر مٹی کی

وہ کیا کیا خاک اڑاتے ہیں زباں پر آ کے تو نے تو

ہماری بات بھی اے نالۂ شب گیر مٹی کی

تم آئے میرے گھر کا ذرہ ذرہ ہو گیا روشن

ہوئی مہر درخشاں سے سوا تنویر مٹی کی

اڑانے دیتے ہیں وحشت زدہ تیرے کوئی دن میں

بڑھے گی جستجو اب صورت اکثیر مٹی کی

وہ آئے خاک اڑانے کو پس مردن تو حسرت سے

ہماری روح کہتی ہے زہے تقدیر مٹی کی

بنایا اس سے ہے دشمن کو اور ہم کو مگر سالکؔ

کہیں توقیر مٹی کی کہیں تحقیر مٹی کی

jo bhar len ek chutki sahab-e-tasir mitti ki

abhi sharminda-e-tasir ho iksir mitti ki

bana kar admi kyun ab-o-gul mein ishq ko dala

nikali hai khuda ne ye nai taazir mitti ki

hamari qabr par bhi ik hujum-e-be kisi hoga

dikha denge pas murdan tujhe tauqir mitti ki

zamin-e-kucha-e-dildar ne kya paon pakre hain

mili diwangan-e-ishq ko zanjir mitti ki

rahega tut kar bhi khana-e-dil alam-e-hasrat

use bhi ap samjhe hain magar taamir mitti ki

yahi mitti hai jis se sab banae jate hain ya rab

buton mein kyun badal jati hai phir tasir mitti ki

wo kushta hun ke roe khak par bhi a gai surkhi

khushi se shakl-e-badli hai dam-e-takbir mitti ki

junun-e-ishq mein tere zamana khak barsar hai

barhi hai in dinon tauqir se tauqir mitti ki

zaban di thi khuda ne bolne ke waste lekin

banaya naz-o-tamkin ne tumhen taswir mitti ki

kahan sail-e-hawadis mein pata ham khaksaron ka

kahin thahri hai ru-e-ab par taamir mitti ki

musallat khakiyon par kyun kya hai charkh ko ya rab

na tha maqbul-e-uzr us ka to kya taqsir mitti ki

wo kya kya khak urate hain zaban par a ke tu ne to

hamari bat bhi ai nala-e-shab gir mitti ki

tum ae mere ghar ka zarra zarra ho gaya raushan

hui mehr-e-darakhshan se siwa tanwir mitti ki

urane dete hain wahshat zada tere koi din mein

barhegi justuju ab surat-e-akser mitti ki

wo ae khak urane ko pas murdan to hasrat se

hamari ruh kahti hai zahe taqdir mitti ki

banaya us se hai dushman ko aur ham ko magar salik

kahin tauqir mitti ki kahin tahqir mitti ki