ایک دن بھی تو نہ اپنی رات نورانی ہوئی

ایک دن بھی تو نہ اپنی رات نورانی ہوئی

ہم کو کیا اے مہ جبیں گر چاند پیشانی ہوئی

سرد مہری کا تری ساقی نتیجہ یہ ہوا

آگ کے مولوں جو بکتی تھی وہ مے پانی ہوئی

اللہ اللہ پھوٹ نکلا رنگ چاہت کا مری

زہر کھایا میں نے پوشاک آپ کی دھانی ہوئی

ہم کو ہو سکتا نہیں دھوکا ہجوم حشر میں

تیری صورت ہے ازل سے جانی پہچانی ہوئی

لے اڑی گھونگٹ کے اندر سے نگاہ مست ہوش

آج ساقی نے پلائی مے ہمیں چھانی ہوئی

جان کر دشمن جو لپٹے جان میں جاں آ گئی

بارک اللہ کس مزے کی تم سے نادانی ہوئی

رفتہ رفتہ دیدۂ تر کو ڈبویا اشک نے

پانی رستے رستے کشتی میری طوفانی ہوئی

کر گئی دیوانگی ہم کو بری ہر جرم سے

چاک دامانی سے اپنی پاک دامانی ہوئی

خون کی چادر مبارک با حیا تلوار کو

میان سے باہر نکل کر بھی نہ عریانی ہوئی

رات کو چھپ کر نکل جاتی ہے آنکھوں سے جلیلؔ

سیر دیکھو نیند بھی کمبخت سیلانی ہوئی

ek din bhi to na apni rat nurani hui

ham ko kya ai mah jabin gar chand peshani hui

sard mehri ka tiri saqi natija ye hua

ag ke molun jo bikti thi wo mai pani hui

allah allah phut nikla rang chahat ka miri

zahr khaya main ne poshak ap ki dhani hui

ham ko ho sakta nahin dhoka hujum-e-hashr mein

teri surat hai azal se jani pahchani hui

le uri ghungat ke andar se nigah-e-mast-e-hosh

aj saqi ne pilai mai hamen chhani hui

jan kar dushman jo lipte jan mein jan a gai

barak allah kis maze ki tum se nadani hui

rafta rafta dida-e-tar ko duboya ashk ne

pani raste raste kashti meri tufani hui

kar gai diwangi ham ko buri har jurm se

chak damani se apni pak damani hui

khun ki chadar mubarak ba haya talwar ko

miyan se bahar nikal kar bhi na uryani hui

rat ko chhup kar nikal jati hai ankhon se jalil

sair dekho nind bhi kambakht sailani hui