جن کے لیے اپنے تو یوں جان نکلتے ہیں

جن کے لیے اپنے تو یوں جان نکلتے ہیں

اس راہ میں وے جیسے انجان نکلتے ہیں

کیا تیر ستم اس کے سینے میں بھی ٹوٹے تھے

جس زخم کو چیروں ہوں پیکان نکلتے ہیں

مت سہل ہمیں جانو پھرتا ہے فلک برسوں

تب خاک کے پردے سے انسان نکلتے ہیں

کس کا ہے قماش ایسا گودڑ بھرے ہیں سارے

دیکھو نہ جو لوگوں کے دیوان نکلتے ہیں

گہ لوہو ٹپکتا ہے گہ لخت دل آنکھوں سے

یا ٹکڑے جگر ہی کے ہر آن نکلتے ہیں

کریے تو گلہ کس سے جیسی تھی ہمیں خواہش

اب ویسے ہی یہ اپنے ارمان نکلتے ہیں

جاگہ سے بھی جاتے ہو منہ سے بھی خشن ہو کر

وے حرف نہیں ہیں جو شایان نکلتے ہیں

سو کاہے کو اپنی تو جوگی کی سی پھیری ہے

برسوں میں کبھو ایدھر ہم آن نکلتے ہیں

ان آئینہ رویوں کے کیا میرؔ بھی عاشق ہیں

جب گھر سے نکلتے ہیں حیران نکلتے ہیں

jin ke liye apne to yun jan nikalte hain

is rah mein we jaise anjan nikalte hain

kya tir-e-sitam us ke sine mein bhi tute the

jis zakhm ko chirun hun paikan nikalte hain

mat sahl hamen jano phirta hai falak barson

tab khak ke parde se insan nikalte hain

kis ka hai qumash aisa godar bhare hain sare

dekho na jo logon ke diwan nikalte hain

gah lohu tapakta hai gah lakht-e-dil ankhon se

ya tukre jigar hi ke har an nikalte hain

kariye to gila kis se jaisi thi hamen khwahish

ab waise hi ye apne arman nikalte hain

jagah se bhi jate ho munh se bhi khashin ho kar

we harf nahin hain jo shayan nikalte hain

so kahe ko apni to jogi ki si pheri hai

barson mein kabhu idhar ham an nikalte hain

un aina rawiyon ke kya mir bhi ashiq hain

jab ghar se nikalte hain hairan nikalte hain