جنگلوں میں جستجوئے قیس صحرائی کروں

جنگلوں میں جستجوئے قیس صحرائی کروں

کب تلک ڈھونڈوں کہاں تک جادہ پیمائی کروں

گر کوئی مانع نہ ہو واں سجدہ کرنے کا مجھے

آستان یار پر برسوں جبیں سائی کروں

بزم ہستی میں نہیں جز بیکسی اپنا رفیق

کس کی خاطر دوستو میں محفل آرائی کروں

غارت دل کا جو کرتا ہے ارادہ ترک چشم

غمزہ کہتا ہے میں تاراج شکیبائی کروں

لے گئے جب تیرے دیوانے کو عیسیٰ نے کہا

ہر گھڑی میں کیا علاج مرد سودائی کروں

آشنا کوئی نظر آتا نہیں یاں اے ہوسؔ

کس کو میں اپنا انیس کنج تنہائی کروں

jangalon mein justuju-e-qais sahrai karun

kab talak dhundun kahan tak jada paimai karun

gar koi mane na ho wan sajda karne ka mujhe

astan-e-yar par barson jabin sai karun

bazm-e-hasti mein nahin juz bekasi apna rafiq

kis ki khatir dosto mein mahfil arai karun

gharat-e-dil ka jo karta hai irada tark-e-chashm

ghamza kahta hai main taraj-e-shakebai karun

le gae jab tere diwane ko isa ne kaha

har ghari mein kya ilaj-e-mard-e-saudai karun

ashna koi nazar ata nahin yan ai hawas

kis ko main apna unnis-e-kunj-e-tanhai karun