جس کو پڑی ہو اپنے گریباں کے تار کی

جس کو پڑی ہو اپنے گریباں کے تار کی

روئے خزاں کو خیر منائے بہار کی

معراج اس کو کہیے ہمارے غبار کی

ورنہ یہ خاک اور ہوا کوئے یار کی

پژمردہ پھول ہوں چمن روزگار کا

تصویر ہوں دورنگئ لیل و نہار کی

نیچی نگاہ آڑ میں مژگاں کی الامان

صیاد جیسے گھات میں بیٹھے شکار کی

چین جبین یار کی چھریاں وہیں چلیں

جوں ہی تڑپ بڑھی نگہ‌ انتظار کی

منہ فق ہے اس طرح مری صبح فراق کا

جیسے ہو پہلی شام غریب الدیار کی

بیتابؔ ختم کر گئے استاد نامدار

جادو نگاریاں قلم سحر کار کی

jis ko pari ho apne gareban ke tar ki

ru-e-khizan ko khair manae bahar ki

meraj us ko kahiye hamare ghubar ki

warna ye khak aur hua ku-e-yar ki

pazhmurda phul hun chaman-e-rozgar ka

taswir hun durnagi-e-lail-o-nahar ki

nichi nigah ar mein mizhgan ki alaman

sayyad jaise ghat mein baithe shikar ki

chain-e-jabin-e-yar ki chhuriyan wahin chalen

jun hi tarap barhi nigah-e-intizar ki

munh faq hai is tarah miri subh-e-firaq ka

jaise ho pahli sham-e-gharib alddiyar ki

betab khatm kar gae ustad namdar

jadu nigariyan qalam-e-sehr kar ki