جس کو پاس اس نے بٹھایا ایک دن

جس کو پاس اس نے بٹھایا ایک دن

اس کو دنیا سے اٹھایا ایک دن

وصل کی شب دیکھتے اس ماہ کو

سال میں بھی وہ نہ آیا ایک دن

صبح نومیدی ہماری شب کی ہے

عمر گزری وہ نہ آیا ایک دن

کام میں میرے ہمیشہ یار نے

ایک ساعت کا لگایا ایک دن

مثل برق اک شب ہنسایا آپ نے

ابر کی صورت رلایا ایک دن

یاد زلف و رخ میں بھولے خواب و خور

ایک شب سوئے نہ کھایا ایک دن

وہ تپ لرزہ کا دورہ ہو گیا

ایک دن آیا نہ آیا ایک دن

یاد جس خورشید رو کی ہے وقارؔ

بھول کر بھی وہ نہ آیا ایک دن

jis ko pas us ne bithaya ek din

us ko duniya se uthaya ek din

wasl ki shab dekhte us mah ko

sal mein bhi wo na aya ek din

subh naumidi hamari shab ki hai

umr guzri wo na aya ek din

kam mein mere hamesha yar ne

ek saat ka lagaya ek din

misl-e-barq ik shab hansaya ap ne

abr ki surat rulaya ek din

yad-e-zulf-o-rukh mein bhule khwab-o-khur

ek shab soe na khaya ek din

wo tap-e-larza ka daura ho gaya

ek din aya na aya ek din

yad jis khurshid ru ki hai waqar

bhul kar bhi wo na aya ek din