جدائی

نگار شام غم میں تجھ سے رخصت ہونے آیا ہوں

گلے مل لے کہ یوں ملنے کی نوبت پھر نہ آئے گی

سر راہے جو ہم دونوں کہیں مل بھی گئے تو کیا

یہ لمحے پھر نہ لوٹیں گے یہ ساعت پھر نہ آئے گی

کہ میں اب صرف ان گزرے ہوئے لمحوں کا سایہ ہوں

اسی بازار میں بارہ برس ہونے کو آئے ہیں

کہ میں نے فاسٹس کی طرح اپنی روح بیچی تھی

مسرت کی مسلسل گردش یکساں سے اکتا کر

تجھے حاصل کیا تھا اور ہر صورت بھلا دی تھی

پرانے ساز و ساماں اب مجھے رونے کو آئے ہیں

غضب کی تیرگی ہے راستہ دیکھا نہیں جاتا

ہوا کے شور میں دریا کی موجیں بڑھتی جاتی ہیں

زمیں سے اکھڑے جاتے ہیں درختوں کے قدم پیہم

چٹانیں روپ بدلے زیر لب کچھ پڑھتی جاتی ہیں

اب اپنی انگلیوں کا فاصلہ دیکھا نہیں جاتا

جرس کی نغمگی آواز ماتم ہوتی جاتی ہے

وہی معمول کے بت ہیں وہی لمحوں کی ویرانی

ذرا سی دیر میں یہ دھڑکنیں بھی ڈوب جائیں گی

مری آنکھوں تک آ پہنچا ہے اب بہتا ہوا پانی

تری آواز مدھم اور مدھم ہوتی جاتی ہے

nigar-e-sham-e-gham mein tujh se rukhsat hone aya hun

gale mil le ke yun milne ki naubat phir na aegi

sar-e-rahe jo ham donon kahin mil bhi gae to kya

ye lamhe phir na lautenge ye saat phir na aegi

ke main ab sirf un guzre hue lamhon ka saya hun

isi bazar mein bara baras hone ko ae hain

ke main ne fastas ki tarah apni ruh bechi thi

masarrat ki musalsal gardish-e-yaksan se ukta kar

tujhe hasil kya tha aur har surat bhula di thi

purane saz-o-saman ab mujhe rone ko ae hain

ghazab ki tirgi hai rasta dekha nahin jata

hawa ke shor mein dariya ki maujen barhti jati hain

zamin se ukhre jate hain darakhton ke qadam paiham

chatanen rup badle zer-e-lab kuchh parhti jati hain

ab apni ungliyon ka fasla dekha nahin jata

jaras ki naghmagi awaz matam hoti jati hai

wahi maamul ke but hain wahi lamhon ki wirani

zara si der mein ye dharkanen bhi dub jaengi

miri ankhon tak a pahuncha hai ab bahta hua pani

tiri awaz maddham aur maddham hoti jati hai