جتائے جاتے ہیں احسان بھی ستا کے مجھے

جتائے جاتے ہیں احسان بھی ستا کے مجھے

سکھا رہے ہیں وہ گویا چلن وفا کے مجھے

رکھا نہ ہم کو کہیں کا تری محبت نے

وہ کہہ رہے ہیں عدو سے سنا سنا کے مجھے

تمیز عشق و ہوس پیشتر نہ تھی ان کو

وہ اور ہو گئے مغرور آزما کے مجھے

شب وصال ادائیں بھی ہیں جفائیں بھی

دکھائے جاتے ہیں انداز کس بلا کے مجھے

جو سیر دیکھنی منظور ہے تمہیں بیخودؔ

بھڑا دو حضرت زاہد سے مے پلا کے مجھے

jatae jate hain ehsan bhi sata ke mujhe

sikha rahe hain wo goya chalan wafa ke mujhe

rakha na ham ko kahin ka tiri mohabbat ne

wo kah rahe hain adu se suna suna ke mujhe

tamiz-e-ishq-o-hawas peshtar na thi un ko

wo aur ho gae maghrur azma ke mujhe

shab-e-wisal adaen bhi hain jafaen bhi

dikhae jate hain andaz kis bala ke mujhe

jo sair dekhni manzur hai tumhen bekhud

bhira do hazrat-e-zahid se mai pila ke mujhe