جدائی کے صدموں کو ٹالے ہوئے ہیں

جدائی کے صدموں کو ٹالے ہوئے ہیں

چلے جاؤ ہم دل سنبھالے ہوئے ہیں

زمانے کی فکروں نے کھایا ہے ہم کو

ہزاروں کے منہ کے نوالے ہوئے ہیں

گزند اپنے ہاتھوں سے پہنچا ہے ہم کو

یہ سانپ آستینوں کے پالے ہوئے ہیں

نہیں نام کو ان میں بوئے مروت

یہ گل رو مرے دیکھے بھالے ہوئے ہیں

نہیں اعتبار ایک دم زندگی کا

ازل سے قضا کے حوالے ہوئے ہیں

ہزاروں کو تھے سرفروشی کے دعوے

تصدق فدا ہونے والے ہوئے ہیں

ہم آواز ہیں عیش و غم دونوں لیکن

ترانے یہ ٹھہرے وہ نالے ہوئے ہیں

منیرؔ اب رہ حق میں لغزش نہ ہوگی

ید اللہ مجھ کو سنبھالے ہوئے ہیں

judai ke sadmon ko tale hue hain

chale jao ham dil sambhale hue hain

zamane ki fikron ne khaya hai ham ko

hazaron ke munh ke niwale hue hain

gazand apne hathon se pahuncha hai ham ko

ye sanp astinon ke pale hue hain

nahin nam ko un mein bu-e-murawwat

ye gul ru mire dekhe bhale hue hain

nahin etibar ek dam zindagi ka

azal se qaza ke hawale hue hain

hazaron ko the sarfaroshi ke daawe

tasadduq fida hone wale hue hain

ham awaz hain aish-o-gham donon lekin

tarane ye thahre wo nale hue hain

munir ab rah-e-haq mein laghzish na hogi

yad allah mujh ko sambhale hue hain