جدائی مجھ کو مارے ڈالتی ہے

جدائی مجھ کو مارے ڈالتی ہے

دہائی مجھ کو مارے ڈالتی ہے

تمہارے عشق میں دنیا ہے دشمن

خدائی مجھ کو مارے ڈالتی ہے

حسینوں کی گلی ہے اور میں ہوں

گدائی مجھ کو مارے ڈالتی ہے

تری جلاد آنکھوں کی ستم گر

صفائی مجھ کو مارے ڈالتی ہے

اسیری میں مزا تھا فصل گل کا

رہائی مجھ کو مارے ڈالتی ہے

خفا ہیں وہ دعاؤں کے اثر پر

رسائی مجھ کو مارے ڈالتی ہے

کیے دیتا ہے قاتل ذبح مضطرؔ

کلائی مجھ کو مارے ڈالتی ہے

judai mujh ko mare dalti hai

duhai mujh ko mare dalti hai

tumhare ishq mein duniya hai dushman

khudai mujh ko mare dalti hai

hasinon ki gali hai aur main hun

gadai mujh ko mare dalti hai

tiri jallad ankhon ki sitam gar

safai mujh ko mare dalti hai

asiri mein maza tha fasl-e-gul ka

rihai mujh ko mare dalti hai

khafa hain wo duaon ke asar par

rasai mujh ko mare dalti hai

kiye deta hai qatil zabh muztar

kalai mujh ko mare dalti hai