جبین شوق کو کچھ اور بھی اذن سعادت دے

جبین شوق کو کچھ اور بھی اذن سعادت دے

کہ ذوق زندگی محدود سنگ آستاں تک ہے

نوید رستگاری پر عبث دل شاد ہوتا ہے

ابھی صد دام اے بلبل قفس سے آشیاں تک ہے

یہ احساس تعلق مجھ کو مٹنے بھی نہیں دیتا

کہ تیری داستاں کا ربط میری داستاں تک ہے

ترانہ چھیڑ وہ مطرب کہ روح عشق چونک اٹھے

خروش نالۂ غم کیا جو سوز جسم و جاں تک ہے

سراپا آرزو بن کر کمال مدعا ہو جا

وہ ننگ عشق ہے جو آرزو آہ و فغاں تک ہے

زمانہ چاہیے تکمیل ذوق لذت غم کو

ابھی دنیائے دل محدود ذکر این و آں تک ہے

بیابان محبت کی نوازش پوچھنا کیا ہے

امید و بیم کی حالت فقط سود و زیاں تک ہے

کہاں سے لائے گی دنیا ہماری ہمتیں آسیؔ

محبت میں قدم اپنا فقط کون و مکاں تک ہے

jabin-e-shauq ko kuchh aur bhi izn-e-saadat de

ke zauq-e-zindagi mahdud sang-e-astan tak hai

nawed-e-rastgari par abas dil shad hota hai

abhi sad dam ai bulbul qafas se ashiyan tak hai

ye ehsas-e-taalluq mujh ko mitne bhi nahin deta

ke teri dastan ka rabt meri dastan tak hai

tarana chher wo mutrib ke ruh-e-ishq chaunk uthe

kharosh-e-nala-e-gham kya jo soz-e-jism-o-jan tak hai

sarapa arzu ban kar kamal-e-muddaa ho ja

wo nang-e-ishq hai jo arzu ah-o-fughan tak hai

zamana chahiye takmil-e-zauq-e-lazzat-e-gham ko

abhi duniya-e-dil mahdud zikr-e-ain-o-an tak hai

bayaban-e-mohabbat ki nawazish puchhna kya hai

ummid-o-bim ki halat faqat sud-o-ziyan tak hai

kahan se laegi duniya hamari himmaten asi

mohabbat mein qadam apna faqat kaun-o-makan tak hai