جب کہ زلف اس کی گلے کھا بل پڑی

جب کہ زلف اس کی گلے کھا بل پڑی

لشکر عشاق میں ہلچل پڑی

چتونوں نیچے کسے آنکھ آپ کی

تکتی ہے پلکوں کے یوں اوجھل پڑی

آہ کالی رات ہجراں کی پھنسی

کرتی ہے کاکل ہی میں کل کل پڑی

کل جو مدح و ذم تھی سانچ اور جھوٹ کی

وہ پھبی ہم پر یہ تم پر ڈھل پڑی

شعلہ خوئی سوچ تیری آج تک

پکتی ہے چھاتی مری کھل کھل پڑی

آہ بس سینے میں وہ رسوا نہ کر

شمع ساں فانوس میں اب جل پڑی

دوستی اس نے جو مجھ سے گرم کی

دشمنوں کو اظفریؔ کچھ جھل پڑی

jab ke zulf us ki gale kha bal pari

lashkar-e-ushshaq mein halchal pari

chitwanon niche kise ankh ap ki

takti hai palkon ke yun ojhal pari

ah kali rat hijran ki phansi

karti hai kakul hi mein kal kal pari

kal jo madh-o-zam thi sanch aur jhut ki

wo phabi ham par ye tum par dhal pari

shola khui soch teri aj tak

pakti hai chhati miri khul khul pari

ah bas sine mein wo ruswa na kar

shama san fanus mein ab jal pari

dosti us ne jo mujh se garm ki

dushmanon ko azfari kuchh jhal pari