جب ہم کلام ہم سے ہوتا ہے پان کھا کر

جب ہم کلام ہم سے ہوتا ہے پان کھا کر

کس رنگ سے کرے ہے باتیں چبا چبا کر

تھی جملہ تن لطافت عالم میں جاں کے ہم تو

مٹی میں اٹ گئے ہیں اس خاکداں میں آ کر

سعی و طلب بہت کی مطلب کے تئیں نہ پہنچے

ناچار اب جہاں سے بیٹھے ہیں ہاتھ اٹھا کر

غیرت یہ تھی کہ آیا اس سے جو میں خفا ہو

مرتے موا پہ ہرگز اودھر پھرا نہ جا کر

قدرت خدا کی سب میں خلع العذار آؤ

بیٹھو جو مجھ کنے تو پردے میں منہ چھپا کر

ارمان ہے جنہوں کو وے اب کریں محبت

ہم تو ہوئے پشیماں دل کے تئیں لگا کر

میں میرؔ ترک لے کر دنیا سے ہاتھ اٹھایا

درویش تو بھی تو ہے حق میں مرے دعا کر

jab ham kalam ham se hota hai pan kha kar

kis rang se kare hai baten chaba chaba kar

thi jumla tan latafat alam mein jan ke ham to

mitti mein at gae hain is khakdan mein a kar

sai-o-talab bahut ki matlab ke tain na pahunche

nachar ab jahan se baithe hain hath utha kar

ghairat ye thi ke aya us se jo main khafa ho

marte mua pe hargiz udhar phira na ja kar

qudrat khuda ki sab mein khula alizar ao

baitho jo mujh kanne to parde mein munh chhupa kar

arman hai jinhon ko we ab karen mohabbat

ham to hue pasheman dil ke tain laga kar

main mir tark le kar duniya se hath uthaya

darwesh tu bhi to hai haq mein mire dua kar